Irail hasieran aurkeztu du txostena Euskalgintzaren Kontseiluak. Premiazko proposamenak ere egin ditu EAErako, Nafarroarako zein Ipar Euskal Herriarendako.

EAErako, esaterako, ezinbestekotzat jotzen dute Hezkuntza Lege berriak zehaztasun gehiago behar duela, hain zuzen ere, euskara gehiago izan dezan.” Eta, batik bat, euskara gutxien dutenek gehiago izan dezaten. Lege egitasmoaren gaineko eztabaida abian da Legebiltzarrean eta ikuskizun da zer gertatuko den. Baina lege proiektuaz harago, proposamen hori onartu edo ez, Araba, Bizkaia eta Gipuzkoako hezkuntza sistemak jauzi bat behar du hizkuntza-politikaren ikuspegitik: euskara gehiago behar du eta, arestian azpimarratu bezala, gutxien duenari gehiago eman behar zaio”.

Nafarroan hesitutako eremua gainditu beharra nabarmendu du Kontseiluak. Euskalduntzeko gutxieneko baldintzak eskaintzen dituen eredua %30az beheitiko hesi horretan dago trabatuta, eta euskararekin inolako harremanik izango ez duten ikasleak erdia baino gehiago dira, %52”. Egoera horretan, premiazko bi neurri ezinbestekoak direla uste du Kontseiluak. Batetik, D eredua %30eko hesitutako eremu horretara kateatzen duten baldintzak aldatu eta eredu hori zabaltzeko sustapen politikak abian jartzea. Bestetik, Nafarroan eskolatzen diren haur guztiei euskararako bidea eskaintzea. Izan ere, ezagutzen ez dena nekez estimatzen da, eta are eta nekezago sentitzen da norberarena”.

 Ipar Euskal Herriari dagokionean ofizialtasun eta ezagutza eza azpimarratzen du erakundeak. Lehentasunezko neurri moduan nabarmendu dituzte Baxoa euskaraz egiteko aukera eta, baita ere, Seaskaz besteko sareetan euskara ardatz dutela ari diren ikasleek Brebeta zein Baxoarekin posibilitate hori izatea.” Halaber, sare publikoan euskarazko ereduak zabaltzeko trabak ezabatzea. Eta, orokorrean, euskara ikasle guztien eskura jartzeko epe luzeko eta hedadura zabaleko politikak abiatzea”.

Txostenean hainbat datu jaso ditu Euskalgintzaren Kontseiluak.

Txostena osorik hemen.

Informazio gehiago Euskalgintzaren Kontseiluaren atarian.