Azaroaren 22tik abenduaren 5era bitartean egingo da ekimena eta haurrekin harreman zuzena duten helduen hizkuntza praktiketan eragitea du helburu. Euskal Herri osoko 80 herri baino gehiagotan egingo da ekimena, tokian tokiko batzordeek eta eragileek antolatuta. Ariketa praktikoa izango da. Hala adierazi dute gaur Donostian egindako prentsaurrekoan ekimena antolatzeko lanetan dabiltzanek.

Euskaltzaleen Topaguneko lehendakari Kike Amonarrizek, Haurren aurrean helduok heldu ekimenaren koordinatzaile eta Topaguneko kide Goiatz Urkijok, eta ekimeneko parte hartzaile eta EBETEko kide Arrate Gisasolak egin dute agerraldia. Haiekin batera, bertan izan dira ekimena babesten duten Eusko Jaurlaritzako Hizkuntza Politikarako Sailburuordetzako, Gipuzkoako Aldundiko eta Donostiako Udaleko ordezkariak eta ekimena antolatuko duten zenbait herrietako ordezkariak ere.

Helduak eredu

Euskaltzaleen Topaguneak koordinatutako ekimena bada ere, Euskal Herri osoko 80 herrik baino gehiagok antolatuko dute ariketa praktikoa euren eremuetan: herriko plazetan, parkeetan, eskola irteeretan, etxeetan eta helduak haurrekin biltzen diren inguruetan.

Helburua da hizkuntza praktikak aldatzeko bidea egiten jarraitzea, eta Euskaraldian sustatzen diren portaerak sozializatzen jarraitu nahi dute ekimen honekin. Oraingoan, ordea, helduen eredugarritasunari ere erreparatu nahi diote antolatzaileek. “Erabilera sozialaren eredurik ez badago, haurrek hizkuntza ikasi bai, baina ez dute jardungo. Euskara egoera eta testuinguru guztietan ohikoa dela sumatu behar dute haur eta gaztetxoek, etorkizunean beraiek ere hala jokatzea nahi badugu”, azaldu du Gisasolak.

“Topagunean oso garbi dugu, euskararen biziberritze-prozesua, batez ere, eraldaketa sozialeko prozesua dela”, esan du Kike Amonarrizek. “Garrantzitsua da, sektorez sektore, herriz herri eta auzoz auzo erabileraren aldeko dinamikak aktibatzea eta sustatzea. Horretara ere badator Haurren aurrean, helduok heldu ekimena”.

Euskara sustatzeko zereginetan sarri eskatu ohi zaie ikastetxeei erantzukizuna, baina Amonarrizen hitzetan, “askotan esan dugun bezala, eskola ez da nahikoa. Haurrek euskaraz egingo badute, eskolatik kanpoko eremuetan ere euskaraz egin behar dute: euskaraz dakiten gurasoekin, etxeetan, aisialdian, beraiei zuzenduriko zerbitzu eta ekintzetan”.

80 herritik gora izena emanda

Goiatz Urkijok jakinarazi du 80 herritik gora daudela ekimenean parte hartzeko izena emanda. Parte-hartzaileei ere egin die erreferentzia. “Parte-hartzaileei eskatuko diegu pentsa dezaten norekin alda ditzaketen hizkuntza ohiturak parkean, eskola inguruan edo umeekin egiten dituzten bestelako ekintzetan; baita kide horiei elkarrekin ariketa egitea proposatzea ere”.

Ekimenarekin lotuta, Paula Kasares eta Kike Amonarriz soziolinguistek hitzaldi sorta eskainiko dute, azaroan zehar, Euskal Herriko hainbat herritan.

Azaroaren 30ean, berriz, ere gaiaren inguruko hausnarketa egingo dute Paula Kasaresek, Kike Amonarrizek eta Iñaki Eizmendik Martin Ugalde foroan Garbiñe Ubedak zuzendutako solasaldietan. Foroa 19:00etan hasiko da Andoaingo Martin Ugalde kultur parkean eta streaming bidez ere jarraitu ahal izango da.

Non egingo da?

. Araban – Bastidan, Gasteizen, Gorbeialdeko Kuadrillan (Aramaio, Arratzua-Ubarrundia, Legutio, Urkabustaiz, Zigoitia eta Zuia) eta Trebiñuko barrendegian (Trebiñua eta Argantzun).

. Bizkaian – Arrigorriagan, Barakaldon, Bermeon, Berrizen, Durangon, Elorrion, Enkarterrietan (Artzentales, Balmaseda, Galdames, Gordexola, Güeñes,Karrantza, Lanestosa, Sopuerta, Turtzioz etaZalla), Erandion, Etxebarrin, Gatikan, Gernika-Lumon, Getxon, Izurtzan, Larrabetzun, Maruri-Jataben, Mungian, Ondarroan, Orozkon, Portugaleten, Sestaon, Ugao-Miraballesen, eta Zeberion.

. Gipuzkoan – Arrasaten, Bergaran, Deban, Donostian, Eibarren, Elgoibarren, Eskoriatzan, Gabirian, Hernanin, Irunen, Lazkaon, Legazpin, Legorretan Oiartzunen, Oñatin, Ordizian, Tolosaldean (eskualde mailan antolatuko dute eskualdeko hainbat herritan), Urretxu – Zumarragan, Zegaman, eta Zumaian.

. Nafarroan – Altsasun, Araitz-Larraunen, Atarrabian, Etxarri Aranatzen, Lakuntzan, Olaztin, Zangozan eta Zizur Nagusian.

. Ipar Euskal Herrian – Hainbat eragileren eskutik sektorialki antolatuko dute ekimena.

Haurren-aurrean_prentsa-dossierra.docxDeskargatu