Ikastolen Elkarteak, Gipuzkoako Urtxintxa eskolak eta Irrien Lagunak elkarteak sortu dute materiala, eta Euskaraldia hezkuntza formal nahiz ez-formalean lantzea da asmoa.

Euskaraldiko unitate didaktikoen aurkezpena egin zuten ostegunean, eta euskararen erabilera dinamizatzeko haur eta nerabeen garrantzia azpimarratu zuten eragile guztiek. Unitate didaktikoaren sortzaileez gain, Euskaraldiko koordinazio nagusiko kideak, Eusko Jaurlaritzako Hizkuntza Politikarako sailburuordea, eta Nafarroako Gobernuko Euskarabidea Euskararen Institutuko, Donostiako Udaleko Euskara Zerbitzuko eta Euskaltzaleen Topaguneko ordezkariak izan ziren prentsaurrekoan. Haur Hezkuntza, Lehen Hezkuntza, Derrigorrezko Bigarren Hezkuntza, Batxilergoa eta Lanbide heziketa barnebiltzen ditu aurkeztutako proposamenak.

Unitate didaktikoak hiru fasetarako prestatu dira. Azaldu dutenez, lehenengo fasea irailetik azaroaren 20ra egingo dela aurreratu dute:  “Euskaraldia girotu, egitasmoaren kontzeptuak ezagutu eta bigarren edizioaren zabalkundea sustatzea da helburua”. Bigarren fasean, berriz, Euskaraldian “murgilduko” dira, horrek iraun bitartean. Bidean ager daitezkeen oztopo eta konponbideak aztertu eta hizkuntza-ohituren inguruan gogoeta aktibatzeko diseinatua dago unitate didaktikoaren etapa hau”, zehaztu dute. Bukatzeko, hirugarren fasea abenduan egingo da eta ariketak iraun bitartean bizitakoa oinarri, “hizkuntza portaera emankorrak” sustatzeko jarduerak osatu nahi dituzte.

Aldizkari monografikoa, hezkuntza ez-formalerako

Prentsaurrekoan azpimarratu zuten ahalegin berezia egin dutela hezkuntza ez-formalera egokitzeko, eta “haurrekin modu ludiko eta erakargarrian” jarduteko. Horren adibide da Irria aldizkariaren ale monografikoa kaleratuko dutela.