Era.eus egitasmotik ekarri dugu gaurko gogoeta hau.

Garaiak aldatuz doaz, abiada bizian gainera, eta garai batean ustekabekotzat eta errealitate berritzat jotzen zena gero eta arruntagoa da gaur egun. Esate baterako, sarritan pertsona arrazializatutzat jotzen direnak, ezaugarri fisiko jakin batzuk dituztenak, euskaldunak izatea. Aurreiritziek bultzatuta, izan ere, joera izaten baita ezaugarri jakin batzuk dituzten pertsonak erdalduntzat hartzeko eta haiekin beti erdarara jotzeko. Ohartu behar dugu, ordea, euskarak kolore ugari dituela.

Pertsona arrazializatutzat jotzen direnen artean, eta ezaugarri horiek dituztenen artean, logikoa den bezala, denetik dago: etorri berriak direnak, aspaldi hemen bizi direnak, hemen jaiotakoak direnak, euskararen arrastorik ez dutenak, euskararen inguruko aparteko interesik ez dutenak, euskara ikasten ari direnak, euskaltzale sutsuak direnak… Eta, halaber, erdaldunak nahiz euskaldunak. Hain zuzen ere, pertsona arrazializatutzat jotzen ez direnen artean bezalaxe.

Horrenbestez, eta hizkuntzari dagokionez ere, berdin jokatu beharko genuke denekin, eta hainbatekin euskaraz egiteko ahalegina eta keinua egiten den bezalaxe, solaskide diren guztiekin berdin-berdin egin daiteke.

Haurren kasuan, eta zehazki eskolan euskaraz ikasten ari direnen kasuan, gertatu da eta gertatzen ari da joera handiagoa dagoela, helduen nahiz haurren artean, haiei gaztelaniaz egiteko, haur ez-arrazializatuekin ez bezala. Egon liteke horren atzean, eta aurreiritziez harago, gauzak errazteko nolabaiteko borondatea, haien ama-hizkuntza eta ohiko hizkuntza erdararen bat delakoan. Baina hala izanen balitz ere, haur horiei laguntzeko modurik egokiena, haien garapen akademikorako nahiz inguruarekiko integraziorako, euskaraz egitea izanen da.

Ez da hain erraza, jakina, haurrek honelako gogoetak egitea, eta egoera horretan garrantzitsua eta komenigarria da gurasoek, jokabidez nahiz hitzez, denekin euskaraz egiteko joera eta ohitura hori transmititzea eta indartzea. Denon mesederako izanen da eta erakutsiko du, berriz ere, euskarak hamaika kolore dauzkala.