Arrasaten, Txatxilipurdik eta Udaleko Euskara Sailak elkarlanean antolatzen duten Freskura izeneko egitasmoa, Monterronen gauzatuko dute nagusiki aurten. Hala ere, igerilekuan ere presentzia izatea nahi izan dute, eta eguaztenetan igerilekuetan egingo dituzte saioak. Haur, nerabe eta helduei zuzenduta egongo da, euskaraz ondo pasa ahal izateko.

Uztailaren 29ra bitartean, 17:00etatik 20:00etara Monterronen, eta ordutegi berean, uztailaren 7an , Musakolako igerilekuan, euskarazko irakurgaiak, mahai-jolasak eta jolaserako elementuak egongo dira denen eskura. “Horrela, euskaraz dauden produktuen ezagutza eta erabilera sustatu nahi dugu”, azaldu dute antolatzaileek.

Adin tarte guztientzako eskaintza da Freskura. “Jolastuz, irakurriz eta tailerretan parte hartuz, parkean edo igerilekuan dauden momentuan euskaraz ongi pasatzeko aukera eskaini nahi diegu, udan ere euskaraz jolasteko, irakurtzeko eta gozatzeko aukerak eskainiz”.

Txatxilipurdi elkartetik, COVID-19a dela eta, indarrean dauden osasun neurri guztiak bermatzen saiatuko direla azpimarratu dute. “Hala ere, parte-hartzaile ororen konpromisoa beharrezkoa izango da neurri hauek guztiak osotasunean bermatu ahal izateko”.

Parte hartzeko aukerari dagokionez, nahi duena agertu daiteke Monterronera. “Dena dela astearte eta ostegunetan tailerrak egingo ditugu eta hauetan izena eman beharko da, Freskuran bertan”.

Bergaran, bestalde, uda garaian orain artean Agorrosin kiroldegian jarri izan duten liburutegia, aurten Usondo parkean jarri dute, pertsona “gehiagorengana” iristeko helburua. Uztailaren 23ra bitartean izango da hori astelehenetik egubakoitzera 11:00etatik 13:00etara eta 15:30etatik 18:00etara.