Eusko Jaurlaritzako Familia eta Haurren Zuzendaritzak familiei baliabideak ematea proposatu du beren ardurapean dituzten haur eta nerabeei laguntza eta orientazioa eman diezaieten Internet zer den eta horrek zein arrisku dakartzan jakin dezaten. Horretarako, Interneten, aplikazioen eta sare sozialen erabilera egokirako laguntza eta orientazio gida batzuk prestatu ditu, gurasoei eta beste pertsona heldu batzuei zuzenduta Internet familian: erabilera seguru baterako jarraibideak izenburupean.

Sei dokumentuz osatutako bilduma da, eta aste honetan aurkeztu dute. Gida horiek adingabearen garapen-etapen arabera antolatuta daude: 0-3 urte, 4-6 urte, 7-9 urte, 10-12 urte, 13-15 urte, eta 16-18 urte. Horietako bakoitzean modu labur eta generikoan azaltzen da nolakoak diren adin tarte horretako adingabeak, nola erlazionatzen diren Internetekin, zer arrisku sor daitezkeen eta zer egin dezaketen erreferentziazko pertsona helduek haiei laguntzeko.

Bilduma sailaren web-orriaren bidez deskargatu daiteke, familiaren arloan: www.euskadi.eus/familia.

Gida hauen helburua da adingabeen adinari egokitutako jarraibide batzuk eskaintzea informazioaren eta komunikazioaren teknologiak (IKTak) arduraz eta segurtasunez erabiltzeko. Baina, betiere teknologia berriak aukeragune gisa ikusita eta ikasteko eta garatzeko, eta berdinekiko eta gizarteko gainerakoekiko harremanak errazteko gune gisa.