BEC eta Donostia: Haurrak hizketan hasi ezinik

haur txikiak gero eta beranduago hasten ari dira hizketan, egunerokoan, kalean zein eskoletan gero eta sarriago ikusten ari garen moduan, eskaintzen dizkiegun ahozko komunikazioa eta interakzioa gero eta urriagoak direlako. Berandutze horrek ondorioak izan ditzake haurren gaitasunean, pentsamenduaren eraikuntzan eta garapen integralean. Jardunaldietako hizlariak Cira Rodriguez Jorge, Nekane Galparsoro eta Marijo Ezeizabarrena  izango dira. Jardunaldiak azaroaren 25ean BECen eta 26an EHUreko Donostiako campuseko Barriola auditoriumean eta izen-ematea zabalik dago.

zenburua: Hizketan hasi ezinik

Kasu askotan, haur txikiak gero eta beranduago hasten ari dira hizketan, egunerokoan, kalean zein eskoletan gero eta sarriago ikusten ari garen moduan. Berandutze horren arrazoiak aztertuko ditugu Haur Hezkuntzako jardunaldietan eta berandutze horrek sortu ditzakeen ondorioak zer-nolakoak diren ikusiko dugu haurren gaitasunean, pentsamenduaren eraikuntzan eta garapen integralean.

Horrekin batera, hizkuntzaren garapena berez nola gertatzen den eta prozesu horrek zein fase dituen ezagutuko dugu. Prozesuaren nondik norakoak jakiteak haurra bere hizkuntza garapen prozesuko zein etapatan dagoen jakiten lagunduko dio hezitzaileari.

Azkenik, hezitzaileei eta irakasleei hizkuntzaren garapena eta lanketa modu kontziente eta eraginkorrean egiteko estrategiak azalduko zaizkie, hizkuntza modu praktikoan lantzeko eta zailtasunak agertzen direnean, horiek nola bideratu jakiteko.

09:00 SARRERA

Komunikazioaren eta hizkuntzaren zentzua. CIRA RODRIGUEZ JORGE. Psikomotrizista terapeuta, diafreoterapeuta eta logopeda.

Gaur egun hizkuntzaren garapenean berandutzea gertatzen ari da gero eta sarriago, eta honek haurraren garapenean eta nortasunaren eraikuntzan ondorioak ditu.

Ingurua ezagutzen ari den haurrarentzat dena berria eta interesgarria da. Ezagutza prozesuan, lengoaiak laguntzeko funtzioa dauka, zaintzekoa. Haurrak guztia behatzen du, guztia ukitzen, imitatzen eta esperimentatzen du. Horiek guztiak bere lengoaia bere zentzu guztietan eraikitzeko espazioak, keinuak, emozioak eta hitzak dira.

Ongizateak zerikusi estua dauka norbere gorputzarekin, norbere buruarekin, ingurunearekin eta baita besteekin ere.

11:00 ATSEDENALDIA

Hizkuntzaren garapena sustatzen. NEKANE GALPARSORO IZAGIRRE. Logopeda eta neuropsikologoa. Neure klinikako koordinatzailea, hizkuntza-ebaluaziorako tresnen garapena, ebaluazio neuropsikologikoa eta hizkuntzaren nahasmenduen eta zailtasunen diagnostikoan.

Hizkuntza gizakion berezko gaitasunetako bat bada ere, bere garapen egokia gauzatzeko testuinguruaren laguntza ezinbestekoa da. Hizkuntzak komunikazioa ahalbidetzen du eta horrek, era berean, hain garrantzitsuak diren ezagutzaren bereganatzea eta pertsonen arteko harremanak. Horregatik, hizkuntzaren garapena sustatzen dituzten baliabideak eta estrategiak lantzea izango da hitzaldi honen helburua

Euskara asko eta euskara gutxiago erabiltzen duten haur euskaldunen hizkuntza garapena

MARIJO EZEIZABARRENA SEGUROLA. EHU-ko ELEBILABeko ikertzaile nagusia eta Hotsetik hitzera liburuaren egilea Junkal Gutierrezekin.  Hizkuntzalaritza eta Euskal Ikasketak Sailean irakaslea.

 Hitzaldi honetan haur euskaldunen hizkuntzaren garapena neurtzeko erabili ohi diren zenbait teknikaren berri emango da. Teknika horiek Euskal Herriko ingurune desberdinetan bizi diren haur euskaldunen hizkuntza ezagutza eta erabilera datuak jasotzeko aukera eman dute, erakusten digutenak haurren eta haien ingurukoen hizkuntza-erabilerak haurren hizkuntza garapenean nola eragiten duen.

GALDERAK eta ITXIERA