Aramaio: Amatasun feministak, June Fernandez kazetariak hitzaldi-solasaldia
Aramaioko Udalak Elkarrekin (des)-ikasten egitasmoa jarri du martxan. Lehen aleak zapatuan bertan ikusi ahal izango dira. Hitzaldian parte hartzeko izena eman behar da eta gaur da horretarako azken eguna.
Elkarrekin (des)-ikasten egitasmoa Aramaion sortu dute eta herritar guztiei zuzendutako ekimena da. Pertsona orok jaiotzetik hil arte duen prestakuntza du ardatz. “Eskolan bakarrik ez da ikasten. Denon artean ikasi eta desikasten dugu, etengabeko formakuntza izan beharko luke bizitzak”, dio Lierni Altuna alkateak. Hain zuzen, herritarren artean etengabeko formakuntza hori bilatu nahi dute, herritarren “aktibatze hori” piztu gura dute.
Ingurumena, kontsumoa, euskara, osasuna, zaintza, generoa eta berdintasuna, nortasuna, herrigintza… Egunerokotasunean eragiten duten hainbat arlotan sakondu nahi dute era kolektiboan. Lehen ekintzek berdintasunarekin izango dute zerikusia. Hain zuzen, Berdintasun Sailak antolatutakoak izango dira.
Lehenengo hitzaldia
Lehenengo ekitaldia zapatuan egingo dute, 10:00etatik 13:00etara, osoko bilkuren aretoan. June Fernandez kazetariak hitzaldi-solasaldia egingo du, Amatasun feministak gaiaren inguruan. Gaur da ikastaroan izena emateko azkeneko eguna: berdintasuna@gorbeialdea.eus.
Bigarren hitzaldia umeek eta nerabeek sare sozialetan dituzten arriskuen ingurukoa izango da: Ziberindarkeria matxistak.
Iruzkinik ez "Aramaio: Amatasun feministak, June Fernandez kazetariak hitzaldi-solasaldia"