Bergara: Ekoizpen duina Kontsumo herrikoia (Material didaktikoaren aurkezpena)
Ekoizpen Duina, Kontsumo Herrikoia material didaktikoen aurkezpena
Biolur elkarteak baratzezaintza ekologikoaren ekoizpen kostuen azterketa integrala eta objektiboa
landu du azkeneko bi urteetan. Duina proiektua deitu diote eta bertan Gipuzkoako eta Bizkaiko 11
baratza proiektuen azterketa egin dute (Debagoieneko hainbat ekoizlek ere parte-hartu dute). Laboreen
ekoizpen kostuak, soldatak, lan orduak, prezio duinak, eta oro har, nekazaritza proiektuen duintasun
ekonomiko eta sozialerako hainbat datutan sakondu dute. Info:
https://www.biolur.eus/eu/proyectos/duina-ikerketa-proiektua
Ikerketa honen ondorioak publiko ezberdinekin lantzeko, material sorta bat kaleratuko da abenduan:
haurrekin, gazteekin eta helduekin lantzeko euskarri ezberdinak garatu dira.
Haur eta familientzako material didaktikoa Bergarako San Martin ikastetxean aurkeztuko da
abenduaren 16an estreinekoz; eskola komunitatea, Biolur elkartea eta Ereindajanek elkarlanean
antolatutako jarduera-sorta baten baitan. Eskolako jangelako proiekturako aberasgarri izatea ez ezik,
elikadura heziketan sakontzeko eta bere osotasunean lantzeko ekimen bateratua izango da.
Irrimarra ilustratzailea eta Sabrina Pato sukaldariarekin landutako material didaktikoak honako
helburua du: elikadura osasuntsuaren garrantzian sakontzea, barazkiak etxean kozinatu eta eguneroko
ekonomian zein ingurumenean duen garrantziaz ohartzea. Hezkuntza praktikoaren bitartez 12
elikagaiekin plater konbinazioak eginez kopuru eta prezioak landuko dira. Bestetik, familientzako
materiala eskuragarri jarriko da, etxeko sukaldeetan ilustrazioek lekua hartu dezaten, elikadura
osasuntsuaren prestaketan lagundu eta motibatuz.
Hiru jarduera antolatu dira:
Lehenbizi, LH2ko ikasgeletan materialak banatu eta landuko dira (abenduak 16 goizean). Barazkiekin,
errezeta koloretsu, dibertigarri eta eskuragarriak nola egin ikasiko da. Baita erosketa kostu eta
ekoizpen kostuekiko hurbilpen bat egin ere.
Egun berean, herritar eta familientzako aurkezpen irekia egongo da arratsaldeko 16:30etan San
Martin eskolako patioan. Errezetarioko kalabaza pizzak dastatzeko aukera egongo da.
Gelan ikasitakorekin, ikasleek eskolatik bisita egingo dute Bergarako Ziarreta baserrira, DUINA
proiektuan parte-hartu duen etxaldeetako bat baita. Ingurunearekiko eta tokiko nekazaritza-
jarduerekiko elkarrekintza honen ondorioz, taldeak elikagaien zikloari dagokion kontu ezberdinak
ikasiko dira praktikatik: baserriaren funtzionamendua eta ekonomia, agroekologia zer den, baratzeko
labore eta lan ezberdinak, konpostak eta ongarritzeak zikloan duen garrantzia..
Iruzkinik ez "Bergara: Ekoizpen duina Kontsumo herrikoia (Material didaktikoaren aurkezpena)"