Emakume batek bularra eman nahi duenean eta arrazoiak edozein izanda ere lortzen ez duenean, ez edoskitzeagatiko dolua bizi dezake. Beste gauza askoren artean porrot-sentsazioa da, batzuetan errudun sentitzera ere eramaten duena. Pediatriako erizain Armando Bastidak ekarri du gaia. “Gauza nabarmen bat gogoratu nahi dut, baina batzuetan merezi du gogoratzea: maitasuna bihotzean dago”, azaltzen die haurtxoari bularra emateko ezintasunean diren emakumeei.

Emakume bakoitza mundu bat da eta nork bere erabakiak hartzen ditu, baina zinez da gogorra haurrari bularra ematea erabaki eta ez lortzea, edo bularra ematen hasi eta denbora gutxira ematerik ez izatea. Emakume asko errudun sentitzen dira, oso errudun.

Hasieran mina, larritasuna, nekea eta etsipena nagusitzen direla azaltzen du Bastidak. Eta horrekin batera negarra, gehienetan. “Gehiago egin daitekeela sentitzea, gehiago jasan eta are gehiago borrokatu”, zehazten du.

Hurrengo agertzen den sentipena gaitzespena dela dio, eta horrekin haurrak negar gehiagorik ez egiteko desira, bularra gehiago ez eskatzeko nahia. “Ez dago haurdunaldian hainbestetan irudikatutako irudi politik. Ehunka aldiz imajinatu duzun ama hori ez zen existitzen. Ezta ume hori ere. Magikoa izango zela uste zenuen. Ederra izango zela. Dena errazagoa izango zela uste zenuen, ez zinela hain bakarrik sentituko…”. Eta nekea handitzen doa. Ama leher eginda dago eta haurtxoa askotan goseturik.

Laguntza eskatu behar da

Lehenbailehen eskatu behar da laguntza. Egoera uste baino ohikoagoa da, eta badaude aditu edo aholkulari onak.

Hala eta guztiz ere gerta daiteke edoskitzeko prozesua ezin burutu izana. Pertsona asko saiatzea, aholku asko jasotzea, eta aholku berri bakoitza itxaropenerako ate berri bat da. Baina gerta daiteke soluzio horiek guztiek ere ez funtzionatzea.

Ama errudun sentituko da eta hilabeteak igaroko dira sentipen horri buelta eman arte. Agian, urteak igaroko dira. Baina beharrezkoa da; izan ere, hori izango da bidea ama eta haurtxoa lasai egoteko.

Argazkiaren iturria hemen.

Informazio gehiago hemen. (gazteleraz)