Familia eta eskolaren arteko harremanak beharrezkoak dira

Eskola eta familia helburu berbera daukaten bi sistema dira: “Guraso eta irakasleok denok nahi dugu pertsona zoriontsu, arduratsu, orekatu, konpetenteak eraikitzen lagundu, modu integralean: plano afektiboan, kognitiboan, fisikoan eta sozialean”. EHUko Pedagogia fakultateko irakaslea den Joxe Amiamaren hitzak dira; aditua da familia eta eskolaren arteko harremanean. “Ezin du sistema batek bestea bakarrik utzi”, dio. Haurraren hobe beharrez lehendabizi, baina baita familiaren eta eskolaren  onurarako eta komunitatearen osasunerako ere, garrantzitsua da familia eta eskolaren arteko harremana zaintzea. Ados dago Elena Lopez de Arana Huheziko irakaslea: “Haurraren garapen osasuntsu bat ziurtatzeko beharturik gaude elkar ulertzera eta elkar laguntzera, bestela ez dago modurik”. Haur Hezkuntzari zuzendurik Hik hasi-k antolaturiko Eskola eta Familia jardunaldietan Lopez de Aranak Alexander Barandiaran irakaslearekin batera eman zuen berbaldiko hitzak dira.

Alabaina, bai sistema bata zein bestea bakarrik sentitzen dira. Eskolaren bakardadeaz hitz egin du Amiamak: “Eskola bakarrik gelditu da hainbat ikasketa erakusteko. Karga handia jarri dugu eskolarengan, familiaz gain instituzio bakarra baita hezten duena. Familiaren egitura ere aldatu egin da, murriztu egin da batetik, funtzioak aldatu dira bestetik, eta inoiz baino agudoago uzten ditu seme-alabak eskola instituzioaren esku”. Adituak, beraz, ados daude familiak eta eskolak aliatuak izan behar dutela haurren heziketan. Bide horretan beharrezkoa ikusten dute sistema batak bestearekiko dituen aurreiritziak alboratzea.

Albistearen iturria hemen.