Familientzako plana: ARPEA LEIZEZULOA eta ORGANBIDEKO KROMLETXA (987 m) (Orbaitzeta – Nafarroa)

Zailtasuna: ertaina / Iraupena: 3 ordu (joan-etorria) / Ibilbidea: 13,53 km  / Goibehea: 310 metro.

Ursario basoa, Organbideko kromletxa edo harrespila eta Arpea leizea ikusteko aukera emango digu ibilbide honek. Nafarroako eta Behe-Nafarroako mugarrien artean ibiliko gara ia ibilbide osoan.

Orbaitzeta herriko arma fabrikatik gora abiatu eta laster iritsiko gara 212. mugarriraino. Bertan utziko dugu autoa eta oso gertu Organbideko kromletxa edo harrespila ikusteko aukera izango dugu. Oinez, aparkalekuaren eskumako aldetik abiatzen den asfaltozko bidea hartuko dugu.

Ibilbide osoan bistan izango ditugu Erroitzate, Orhi eta Mendizar tontorrak. Bideak artzain borda talde batera eramango gaitu, eta eskumatik egingo dugu aurrera azken bordara iritsi arte. Borda hori ere eskuman utziko dugu eta hesi bat gainditu beharko dugu. Apur bat aurrera eginda berehala agertuko zaigu Arpea deituriko leizezuloa. Iritsi aurretik erreka txiki bat gurutzatu beharko dugu.

Ardien babesleku da Arpea leizea, baina ikusgarria benetan.