Belaustegi ur-jauzia Orozkoko udalerrian kokatu dago, Gorbeiako Parke Naturalaren barruan, Bizkaian. Oderiagaren iparraldeko magalean behera datozen urek 30 metro inguruko jauzia egiten dute landaretzak estalitako horma berdez inguraturik.

Bide beretik egin behar da joan-etorria, baina bide erraza da eta kilometro inguruko tartea da. 30-45 minutu inguru beharko ditugu ur-jauzira iristeko.

Bidea ez dago seinaleztatuta, baina erraza da bertara iristea. Ibarra auzotik porlanezko bide aldapatsu bat igotzen da aparkaleku bateraino. Aparkalekutik bidezidor bat abiatzen da ekialderantz, konifera basoan zehar. Pixkanaka altura galduz joan behar da, errekastora iritsi arte. Tarte labur bat errekan gora eginez laster iristen da ur-jauzira.