Mutiloako Barnaola baserritik abiatzen da Mutiloa-Ormaiztegi bide berdea. Oinez zein bizikletan egin daiteke. Laua eta polita da. Familian egiteko, primerakoa! Gomendioa da Mutiloan aparkatzea, eta oinez egitea Barnaola baserrirainoko Troi Bidea.

Barnaola baserri parean zuen hasiera Compañía Minera de Mutiloa S.A. etxeak egindako trenbideak. Lau kilometro eta erdiko trazatua egiten zuen Peatza delako mea ustiatzeko gunetik jaitsitako mineralarekin. Trena 1898tik 1927ra egon zen martxan.

Barnaolatik aurrera joanda tren bideak ez du galbiderik. Baliza zenbakituekin seinaleztatutako bidea da eta trazatuan atseden guneak, jolastokiak eta taberna jatetxeren bat ere bada.

Abiatu eta laster errepide txiki bat gurutzatu beharko dugu. Ez da zirkulazio handirik ibiltzen, baina hala ere adi ibili! Berehala, lehenengo ataka zabaldu eta itxi beharko dugu. Oinezkoentzat, hori bai, bada pasabide estu bat alboetako batean.

Bide laua eta erosoa da Mutiloa eta Ormaiztegi arteko bide berdea. Ingurune ederra da. Hasiera batean belardiz eta soroz osatutako parajea izango dugu.

Ibilbidearen erdi parean atseden gune bat aurkituko dugu. Mahaiak, iturri bat eta bizikletako gurpilak haizatzeko gailua daude bertan. Aparkalekua ere bada. Berriro ere errepide bat gurutzatu beharko dugu baina lasai egingo dugu bidean aurrera.

Berehala helduko gara Liernia izeneko ermita ingurura. Proposatzen dugu geldialdirik egin gabe aurrera jarraitzeko eta hala gurutzatuko dugu izen bereko zubia. Oraindik ere bertan daude tren zaharraren trenbide zati bat.

Pinudian sartuko gara hurrengo eta sumatuko dugu itzalaren eragina. Hala, zuhaitz azpian iritsiko gara trenbidearen amaierara. Aldapa handi bat jaitsi beharko dugu Ormaiztegiko trenbide biaduktu zaharra gertutik ikusteko. Aldamenean da berria ere. Aukerazkoa da jaitsiera hori egitea. Ikuspegiak pena merezi du, baina gogoratu gero berriz igo beharko dela trenbideraino.

Pinudian barrena bide berdinetik egingo dugu itzulera. Kasu honetan geldialdia egingo dugu Liernia ermita inguruan. Paraje polita eta lasaia da. Ermita egoteaz gainera taberna-jatetxea, erabilera libreko komunak, haur parkea eta terraza ederra ditu.

Atseden hartu ondoren itzuliko gara bidera. Berriz ere atseden gunetik pasa eta atakak zabaldu atakak itxi itzuliko gara Barnaola baserri ingurura.

Orientazio jokoa

Bada aukera pixka bat luzeago den ibilbide zirkular bat egiteko. Mutiloan abiatu eta amaitzen da. Goierriko hainbat erakundek, gainera, ibilbide horri lotutako orientazio joko bat dute prest. Troi Bidea + Mutiloa-Ormaiztegi Bide Berdea hartzen ditu eta neska-mutikoei osatu beharreko askotariko frogak proposatuko dizkie jokoak. Orriak doan jaso daitezke Ormaiztegiko Zumalakarregi museoan.