Garrantzitsua da guraso ez diren lagunak edukitzea
‘Entre padres’ webguneko Luzia Vazquezek lagunarteko harremanak mantentzeko gomendioa egiten du.
Egunerokoa zeharo aldatzen da guraso bihurtzen garenean; bikote harremana ere asko aldatzen da. Horregatik, zenbait adituk diote garrantzitsua dela guraso ez diren lagunekin harremana lantzea.
Bikotekidea dugunean aldatzen da apur bat lagunekin dugun harremana, baina guraso bihurtzen garenean aldaketa nabaria da. Ardura berriak, zeregin gehiago… lehenengo sakrifikatzen duguna, gehienetan, lagunarteko hitzorduak dira. Ulertzekoa da neurri batean, baina argi eduki garrantzitsua dela lagunak mantentzea; irtetea eta aisialdirako denbora librea hartzea. Bikotearekin edo lagunekin. Bakarrik ere bai, zergatik ez! Garrantzitsua da osasunerako eta guraso hasiberrien ongizaterako. Osasun emozionalerako ona da guraso izan aurretik gogoz egiten genituen jarduerak mantentzea, ahal den neurrian.
Guraso ez diren lagunekin tarteka elkartzea ere gomendagarria da. “Gazteago egiten gaitu eta indarra ematen digu eguneroko zeregin eta betebeharrei aurre egiteko”. Lagunarteko hitzordu horiek aukera emango digute umeekin edo familiarekin zerikusirik ez duten gaietaz jarduteko. Etxea edo lantokia ez den beste lekuren batean elkartzeak soilik eragin handia izan dezake.