Urtez urte haziz doan ospakizuna da eta Euskaltzaleen Topaguneak formakuntza saioa eskainiko du irailaren 25ean. Josu Ozaita antropologoak eta Mitxel Elortza irakasle eta idazleak emango dute. 18:30ean izango da eta edonori irekia dago.

Doako online formakuntza saioa izango da eta GAU BELTZA ospakizunaren inguruko ezagutzan sakontzea du helburu.  Zer da Gau beltza? Zein jatorri du? Nola ospatzen da?

Josu Ozaitak antropologoak GAU BELTZAren jatorriaz hitz egingo du eta Mitxel Elortza irakasle eta idazleak ospakizunaren inguruko balioez jardungo du.

Izen-ematea zabalik da esteka honetan.

Zortzi bideo motz eskura

Ez da 2024ko GAU BELTZA sustatzeko Euskaltzaleen Topaguneak egingo duen ekimen bakarra. Ospakizunaren inguruko zortzi bideo motz sortu berri ditu mugimendu euskaltzaleak, GAU BELTZAk bere baitan biltzen dituen ezaugarri ezberdinak eta ospatzeko moduak ezagutzera emateko.

Bideo guzti hauek elkartearen Youtubeko kanalean daude ikusgai eta aurki jarriko dira webgunean erabiltzaileek deskargatu ahal izateko.