Ekimenak Gipuzkoa Active Hacking du izena, eta Foru Aldundiko Kultura, Turismoa, Gazteria eta Kirola sailetik bultzatzen dute. Lurraldeko 12 eta 18 urte bitarteko gazteei dei egin diete taldea sortu eta maiatzaren 6rako deitu duten ekimenean parte hartzeko.

“Sortu talde bat; bilatu leku egokia; diseinatu jolas aktiborako edo kirolerako eremu bat; egin; jolastu; igo irudiak sare sozialetara #gipuzkoaactivehacking traola erabilita; bildu dena; egin gehiagotan ere”, adierazi dute egindako deialdian. “Proposatzen dizugu udalerrian bertan esku hartzea, espazio publikoko eremuetan —kaleetan, plazetan, parkeetan…—, jolasak espazioak berrinterpretatu eta horietan eragina izango duen lekuetan. Proposatzen dizugu material sinpleak, berrerabiliak eta lortzen errazak direnak erabiliz erabilera berriak irudikatzea, eta jarduera fisikoa egiteko eta pertsonen arteko harremanetarako eremuak asmatzea”.

Irudimena landu

Gipuzkoako Foru Aldundiko Kultura Departamentuko Kiroletako Zuzendaritzatik jakinarazi dute gazteen irudimena sustatu nahi dutela hirigunean jarduera fisikorako aukerak bila ditzaten. “Gazteek inguruari begiratzeko modu bat gara dezatela nahi dugu, espazioak berrinterpretatu eta jolas aktibo propioak diseina ditzatela”.

 

Informazio gehiago:

http://www.gipuzkoa.eus/es/activehacking

https://www.facebook.com/GipuzkoaKirola

https://twitter.com/GipuzkoaKirolak

Argazkien iturria: Gipuzkoa Active Hacking