Gipuzkoako Harrera familien XXIII. Topaketa egin zuten zapatuan, haurren babesaren arloko 150 familia eta profesional batuz. Edizio honetan, “harreraren harreman-begirada” landu du ekitaldiak, “Nork zaintzen du nor?” galderan jarriz fokua.

Familia gehiago behar dira

Gipuzkoako Foru Aldundiak emandako datuen arabera, 815 adingabe tutoretzen dituzte. Horietatik 489 zentroetan bizi dira eta 326 harrera-familietan. Familia baten zain dauden haur eta nerabeak berriz, 90 dira.

Maite Peña Zainketa eta Gizarte Politiketako diputatuak adierazi du “familia berriak” behar direla “gaur egungo babes-premiei erantzuteko”, eta, horrekin batera, eskerrak dizkie harrera familia gisa jarduten dutenei: “Denok dakigu zein konpromiso dakarren pertsona bati etxeko ateak irekitzeak. Horregatik, eskerrak eman nahi dizkiet harrera familiei eta arlo honetan lan egiten duten elkarteei egunero egiten duten lan deskribaezinagatik”.

Hiru harrera-modalitate

Aldundiak Hiru harrera-modalitate eskaintzen ditu: larrialdiko modalitatea, aldi baterako modalitatea eta modalitate iraunkorra. Larrialdiko modalitateak gehienez ere sei hilabeteko iraupena du eta berehalako ebaluazioa behar duten egoeretara zuzenduta dago. Aldi baterako modalitatea, jatorrizko familiara itzultzeko aukera duten adingabeei egokitutakoa da eta bi urtera arteko epea hartzen du. Modalitate iraunkorrak berriz, epe laburrera itzultzea aurreikusten ez den kasuak hartzen ditu.

Harrera familien informazio gehiago lortzeko, Aldundiarekin harremanetan jarri daiteke, 682 55 44 33 telefonora deituz edo webgune ofiziala kontsultatuz.