Herriko hiru ikastetxeekin eta haur eskolarekin batera, Andoaingo AEK-k martxan jarri berri du gurasoen mintzalagun programa. Hamazazpi guraso hasiak dira parte hartzen.

Captura de pantalla 2015-01-12 a las 11.27.14

Euskaraz ari dira. Hasi berri duten esperientziaren bizipenak azaltzen dihardute. Hilabete eskas daramate, baina, izan ikasle zein irakasle, denen aurpegietan nabari da poza eta ilusioa; Andoain (Gipuzkoa) herri euskaldunagoa egitearena, euskara jaso eta ematearena. Saioa Audikana, Esther Agirre eta David Pardo dira AEK-k bultzatuta sortutako mintzalagun guraso taldeko kideak. Hirurek nabarmendu dute oso esperientzia aberasgarria izaten ari dela.

Herriko hiru ikastetxeak eta Galardi haur eskola bildu ditu egitasmoak. Mintzalagunari lotuta, aurretik AEK-k egina zuen saialdi txiki bat egitasmoa martxan jartzeko. «Benetako apustua, dena den, iazko uda aurretik egin genuen. Ikastetxe guztiekin bildu eta, irailetik aurrera, proiektua lantzen hasi ginen», azaldu du Kristina Bernalek, egitasmoaren arduradunak. Ikastetxeen aldetik, erantzuna paregabea izan zen. «Denak agertu ziren laguntzeko prest, beharra ikusten baitzuten halako egitasmo bat martxan jartzeko». Azkenean, 23 gurasok eman zuten izena, eta egun, hamazazpi ari dira parte hartzen. «Mintzalaguna egitasmoaren beste adar bat da, eta espero dugu hura bezala sendotuz joatea; ezagutu ahala, guraso gehiago animatzea».

Albistea osorik eta argazkiaren iturria Berrian.