Gurasoak euskaraz aritu ala ez aritu; emaitza ez da bera

Gurasoek euskara zenbat eta gehiago erabili, seme-alabek orduan eta euskara maila hobea dute. Jakinekoa da eta bistakoa, baina euskararen transmisioarekin arduratuta dauden erakundeek eta elkarteek beharrezko ikusten dute tarteka horrekin ohartarazteko sentsibilizazio kanpainak egitea.

Eibarko … eta kitto! euskara elkarteak antolatuta Euskararen transmisioa izeneko mintegia egin dute maiatzean. Eskoletan lan handia egin da euskararen ezagutza eta erabilera bultzatzeko, baina hizkuntzaren transmisioan etxeak eta familiak berebiziko garrantzia duela bat etorri dira hizlari guztiak.

EHUko Hezkuntza Zientzietan doktore den Pello Jauregik bi ikerketaren ondorioak aurkeztu zituen.

2012an egin zuten Lasarte-Orian etxeko eta kaleko hizkuntza erabileraren arteko loturak ikertu zituen lana. Emaitzen artean nabarmentzen da honako ondorioa: guraso biak euskaradunak dituzten seme-alaben hamarretik bederatzik euskara maila oso ona dute; gurasoetako bat erdalduna dutenean berriz, hamarretik sei dira euskara maila ona dutenak; eta bi gurasoak erdaldunak direnean hamarretik bi baino ez dira mintzatzen ongi euskaraz.

Erabilera eta hizkuntz gaitasuna

“Batzuetan, gurasoak euskaldunak izanagatik elkarrekin gaztelaniaz hitz egiteko joera dute, eta horrek albo kalteak sortzen ditu hizkuntza transmisioan”, esan zuen Hernaniko Udaleko euskara teknikari Malores Etxeberriak Familia bidezko transmisioa: guraso euskaldunen diskurtsoa hitzaldian. Alegia, hizkuntza gaitasuna estuki lotuta dagoela erabilerarekin.

Zentzu horretan, Etxeberriak uste du garrantzitsua dela hizkuntza menperatzen ez dutenen ahalegina baloratzea eta inguru atseginak sortzea haien hizkuntz erabilera handitzeko. Hizkuntza balio modernoekin lotzea ere garrantzitsua da. Hala, gurasoak ez dira euskararen transmisiorako gako bakarrik, baina bai oso garrantzitsuak. Aldi berean garrantzitsua da eremu kolektiboetan euskararen erabilera sustatzea.

Albistearen iturria, Argia astekaria.