Ume baten etorrera momentu eraldatzailea da, baina gatazkak ere ekar ditzake, batez ere gurasoen artean ikuspuntu ezberdinak daudenean. Bi pertsonek, bakoitzak bere historia eta bizipenak izanik, seme-alaben heziketari buruz ikuspegi desberdinak izatea erabat naturala da. Desberdintasun horiek ez dira harremanaren huts gisa ikusi behar; aitzitik, aukera bat dira ikuspuntu ezberdinak hobeto kudeatzeko.

Bikotearen kide bakoitzak bere zama emozionala, balioak eta bizipenak ditu, eta guztiek eragina dute guraso gisa hartzen dituzten erabakietan. Adibidez, batzuk familia zorrotz batean haziak izan daitezke, beste batzuek, aldiz, giro baimengarriagoan. Esperientzia horiek baldintzatzen dute gurasoek “onena” zer den uste duten seme-alabentzako. Hemen gakoa ez da beti ados egotea, baizik eta desberdintasun horiek modu eraikitzailean kudeatzen ikastea.

Desberdintasunak jorratu aurretik, oso erabilgarria izan daiteke norberak bakarka hausnartzea. Zergatik defendatzen dut nire ikuspegia? Zer balio pertsonalek bultzatzen naute seme-alabak hazteko modu honetan? Aldi berean, bikotearen motibazioak ulertzen jarri gaitezke. Desadostasunen atzean helburu komun bat dago: seme-alaben ongizatea. Helburu hori aitortzeak tentsioak arindu ditzake eta elkarrizketa produktibo baterako bidea zabaldu.

Behin hausnarketa egin ondoren, momentua da lasai eta modu irekian hitz egiteko. Gakoa entzute aktiboa da: bikotekideak esaten duenaren atzean zaintzen egon daitekeena ikusi, epaitu gabe. Elkarrizketa honetan, balio eta helburu partekatuak bilatzea da xedea. Adibidez, gurasotako batek seme-alaba baten jokaera desegoki baten aurrean zigorra ezarri nahi izan diezaioke eta besteak ez. Aldi berean, ziurrenik biek nahi dute egoera horren kudeaketan seme-alaba arduratsua izaten laguntzea baina estrategiak dira txokean daudenak. Horrelako abiapuntu batek desberdintasunak kontuan hartzen dituen plan bat eraikitzen lagundu dezake.

Hala ere, beti egon daitezke gai batzuk non ez den erraz a akordio batera iristea. Kasu horietan, elkarri laguntzea edo zenbaitetan amore ematea familiaren ongizate emozionala lehenesteko modu bat izan daiteke. Hori ez da printzipioei uko egitea, baizik eta maitasuna eta eskuzabaltasuna erakusteko ekintza bat litzateke.

Gatazken erdian erraza izan daiteke eztabaidan irabaztea helburutzat jartzea, baina benetan funtsezkoa dena seme-alaben ongizatea da. Honekin batera, nola nahi dugu gure seme-alabek beren gatazkak konpontzea? Guk talde-lanean eta elkarrizketan oinarrituta konpontzea nahi badugu, portaera hori gure bikotearekin modelatzen erakutsi diezaiokegu, ez ni gorago ezta beherago jarriz.

Azkenik, ezinbestekoa da onartzea ez garela beti ados egongo, baina gure desberdintasunak errespetuz eta ulermenarekin kudeatu ahal ditugula. Horrek familia sendo eta osasuntsu bat eraikitzeko lehen urratsa ematen lagunduko digu. Azken finean, garrantzitsuena ez da dena perfektua izatea, baizik eta gure desberdintasunak onartzea eta aurrera egiteko norabidea garbi izatea, guraso edo/eta bikote gisa.