Azken urteotan gurasoen aurkako indarkeria kasuek gora egin dute. Sarritan indarkeria irain edo eta erantzun txarrekin hasten da seme-alabek 12 eta 14 urte artean dituztenean; kolpeak atean, bultzadak… Eusko Jaurlaritzak argitaratutako datuen arabera, mutilak izaten dira bereziki gurasoen aurkako indarkeria egiten dutenak; erasotzaileen %70a. Hala ere, alaba erasotzaileen kopurua handitzen joan da azken boladan. Biktimari dagokionez, ama izaten da gehienetan erasoa jasaten duena.

Erasotzailearen perfila aztertzerakoan datu deigarri batzuk aurki ditzakegu; %53a errepikatzaile dira eskolan, %25ak indarkeria jasan du eskolan eta %20a genero indarkeriaren lekuko izan dira etxean. 

Erasoen jatorriari dagokionez autoestimua baxua eta gurasoen arauak jartzeko zailtasunak dira ondorio nagusi. 

Arazo honi aurre egiteko hainbat prebentzio programa jarri dira martxan. Haietako bat “Hobetzen zentroa” da; etxean erasotzaile diren nerabeekin lan egiten duen familia alorreko esku-hartze programa. Hobetzen zentroa Bizkaiko Foru Aldundiaren (BFA) eskumena da, eta Gizarte Ekintza Sailaren mende dago, Emakumeak Babesteko eta Familiei Laguntzeko Zerbitzuaren barruan zehazki. Bizkaiko Lurralde Historikoan bizi diren familiei zuzenduta dago, 10 urtetik 21 urte bitarteko seme-alabak dituzten eta gurasoen kontrako indarkeria bizi duten familiei. Halako indarkeriatzat hartzen da seme edo alaba batek amaren edo beste senide baten gaineko boterea edo kontrola lortzeko egiten duen ekintza kaltegarri oro. Erasoa fisikoa, psikologikoa edo ekonomikoa izan daiteke:

  • Eraso fisikoa: kolpeak, bultzakadak, objektuak jaurtitzea, eta abar
  • Eraso psikologikoa: irainak, mehatxuak, umiliazioak, ihes egitea; amari, aitari edo beren buruari min egiteko mehatxuak, eta abar.
  • Eraso ekonomikoa: baimenik gabe gauzak hartu edo lapurtzea, etxean edo gurasoen gauzetan kalteak eragitea eta gurasoek lortu ezin dituzten gauzak eskatzea.

Proiektu honek gurasoen aurkako indarkeria akabatzea du helburu nagusi. Horretarako indarkeria jasaten ari diren guraso guztiak gonbidatzen dituzte zentroan parte hartu eta arazoari aurre egitera.