Gurasoen hezkuntza-lanari babesa emateko helburuarekin, seme-alaben. heziketaren inguruan zenbait tailer antolatu ditu Arrasateko udalak datozen hilabeteetarako. Eneko Azurmendi kazetariak idatzi zuen, joan den astean, horri buruzko albistea Goiena astekarian. Hemen duzue irakurtzeko aukera:

Gurasoentzako tailerrak antolatu ditu Udalak, helburu nagusi batekin: “Gurasoekin seme-alaben heziketaren inguruan hausnartzea eta gurasoei egunerokotasunean sortzen zaizkien kezka eta zailtasunak partekatzeko guneak eskaintzea”.

0 eta 2 urte arteko seme-alabak dituztenentzat, haziera eta haur masaje tailerra egingo dute, haurraren jarrerak ulertzeko eta guraso moduan nola hobetu ikasteko, otsailaren 12an hasita, Itziar Rosadoren eta Jon Urdinetaren eskutik. Lau saio egingo dituzte, eguaztenetan, Txikitchokoan, 10:00etatik 11:30era, haurraren garapena ezagutzeko edota gurasoen eta haurren arteko harreman eta loturak aztertzeko.

2 eta 6 urte arteko seme-alabak dituztenentzat, bizipen tailerrak izango dira Arizmendi Ikastolako Olarte gunean zein Arrasate Herri Eskolaren Erguin gunean. Olarte guneari dagokionez, otsailaren 5ean, martxoaren 5ean, apirilaren 2an eta maiatzaren 14an izango dira saioak, 17:00etatik 19:00etara. Erguinen, aldiz, otsailaren 12an, martxoaren 12an, apirilaren 9an eta maiatzaren 21ean, horiek ere 17:00etatik 19:00etara. Saio horiek guztiak Itziar Rosadok dinamizatuko ditu.

Era berean, 6 eta 11 urte arteko seme-alabak dituztenekin guraso abileziak garatzeko trebakuntza praktikoa egingo dute, Kulturateko Garibai gelan, 17:30etik 19:30era. Sei saio egingo dituzte: otsailaren 20an eta 27an; martxoaren 20an eta 27an; apirilaren 10ean eta maiatzaren 15ean. Leyre Canok dinamizatuko ditu tailerrak.

Azkenik, 12 eta 16 urte arteko seme-alabak dituztenentzat, Nerabezaroa, erronka bat norentzat? izeneko tailerra egingo dute, Agipad elkartearen eskutik. Zortzi saio izango dira: otsailaren 5ean eta 26an; martxoaren 5ean eta 26an; apirilaren 2an eta 30ean; eta maiatzaren 21ean eta 28an. Kulturateko Jokin Zaitegi gelan egingo dituzte guztiak, 18:00etatik 20:00etara.

Izena emateko bi bide daude: Udal webgunean eman daiteke izena dagoeneko –izenemateak: arrasate.eus/eu/–, baita BAZera deituta ere, 943 25 20 00 telefono-zenbakira.