“Azken hilabeteetan Palestinan egoerak okerrera besterik ez du egin eta bai Israelek eta baita bere aliatu diren AEBk euren plan genozidak lotsagabeki mahai-gaineratu dituzte. Gure Haurrak ere Badira ekimenetik ezin dugu isilik egon egoera honen aurrean, hiltzen ari direnak gure anai-arrebatzat eta gure haurtzat hartzen ditugu eta”, azaldu dute ekimenetik.

Hala, ikasturte amaierarako bi ekimen berri deitu dituzte. Alde batetik, martxa bat deitu dute ekainaren 12rako Gasteizen. Bestetik, Gogoan zaituztegu! kanpainaren barruan bi deialdi egin dituzte: ikastetxeetako ikasgela huts batean ume palestinarren omenez lore sortak jartzeko eta gurehaurrak@gmail.com helbidera elkartasun-mezuak bidaltzeko ekainaren 20ra arte.

Martxa ekainaren 12ean Gasteizen

Ekainaren 15an Rafah-ra martxa internazionala burutuko da, mundu osotik joandako milaka pertsona blokeoa apurtzen saiatuko direlarik. “Data hori baliatuta, Gure Haurrak Ere Badira-ren ekarpena egingo dugu Gasteizen. Ekainaren 12an, 17:00etan hiru zutabe aterako dira hiriko hiru gunetatik: Bastida plaza, Ekialdeko parkea eta Gasteizko autobus geltokitik, hain zuzen ere. Hiru zutabeak Plaza Berrian elkartuko dira 18:30ean. Bertan, elkartasun ekitaldi koloretsua antolatu dugu: Porrotx, ipuin kontaketa, zozketa solidarioa, elkartasun askaria, tailerrak… Plaza Berrian Palestinako koloreez osatutako mosaiko burutuko dugu”, azaldu dute. “Biltzen dugun diru guztia UNRWAra bidaliko dugu, Palestinako errefuxiatu kanpalekuetara bideratzeko”.

Ohiko babesaz gain –LAB, STEILAS, ELA, CCOO, UGT, CNT, EHIGE, Ikastolen Elkartea–, Gasteizko hamalau guraso elkartek eta eskolak baino gehiagok adierazi diote atxikimendua mobilizazioari. Besteak beste, Zabalgana eskola, Zabalgana institutua, Armentia, San Martin, Mariturri, Aldaialde, Abendaño, Ibaiondo, Barrutia, Toki Eder, Gereñu, Ganivet, Mendebaldea, Cervantes eta Arantzabela.

Ikasgeletan ‘Gogoan zaituztegu! ekintzak

Ikastetxeetan egiteko elkartasun keinuak ere proposatu dituzte Gure Haurrak Ere Badira ekimenetik. “Euskal Herriari, munduari eta batez ere, gure arreba-anaiei heldu behar zaien elkartasun irudi indartsu bat sortu nahi dugu”, azaldu dute. Honela azaldu dute:

. Zer? Ikastetxe guztietako ikasgela huts bateko mahaietan erail dituzten ume palestinarren omenez, lore bana jarriko dugu.

. Noiz? Ekainaren 1etik 20ra arte elkartasun-mezuak gurehaurrak@gmail.com helbidean jasoko ditugu.

. Eta gero?

  • Irudi guztiak bildu  eta @gurehaurrak.bsky.social kontuan saretuko ditugu. EAEren eta Nafarroako gobernuen hezkuntza eta justizia sailetara ere bidaliko ditugu, EHko hezkuntza komunitatearen sentimenduaz jabe daitezen.