Gure seme-alaben belaunaldia teknologia berrien eta sare sozialen belaunaldia da
Sareak harrapatzen gaitunerako aholkuak eman dizkigu Naiara Loy sexu hezitzaileak Puntua aldizkarian. Ezinbesteko jotzen ditu haurren eta nerabeen kritikotasuna lantzea zein gurasoek sare sozialen erabilpenak eta funtzioak ezagutzea.
Gaur egun zenbait sare sozial dira eskura ditugunak, tresna baliagarriak dira eta baliabide ugari eskaintzen dizkigute: komunikazioaren hobekuntzarako, ezagutzak elkartrukatzeko, harremanak erraztezko, argazkiak konpartitzeko… baina argi dago horien erabilpena ondo kudeatzeak ahalegin handia eskatzen duela.
Arriskuen aurrean, familia
Jakin badakigu arriskuak daudela: argazkien erabilpen desegokia, ziber-bullying-a, sexting-a, kontrola, pribatutasuna… Horren guztiaren aurrean neurri positiboak hartzea da garrantzitsuena, ezin dugulako ukatu gure seme-alaben belaunaldia teknologia berrien eta sare sozialen belaunaldia dela, eta tresna horien erabilpena agerian dagoelako. Kasu honetan, familiaren erantzukizuna funtsezkoa da, seme-alabei zentzuz eta errespetuz jokatu behar dutela transmititzeko.
Bestetik, gurasoek sare sozialen erabilpenak eta funtzioak ezagutzea ezinbestekoa da, eta Interneten nabigatzean adingabeek aurki ditzaketen eduki desegokiak kontrolatzea. Horretarako, gurasoen kontrola funtzioa oso tresna baliagarria da, Interneteko sarbide desegokiak eragozteko eta bilaketen informazioa iragazteko.
Horrez gain, haurren eta nerabeen kritikotasuna lantzea erabakigarria da, horien jabekuntzarako eta pertsonalitatearen garapenerako lehentasunezkoa. Hausnarketarako espazioak utzi behar zaizkie eta konfiantzazko harremanak sustatu behar dira. Seme-alaben jokabideak positiboak direla bermatzeko modurik onena eurekin hitz egitea da, horrela elkarren artean sortutako komunikazioak eta hurbiltasunak arau zehatz batzuk adostera eramango gaitu.
Harremanetarako bide berria
Denok dakigunez, sare sozialak besteekin harremanak izateko modu berria bilakatu dira, eta gaur egun oso zabalduta dago hedabide horien bitartez bizipenak, sentimenduak eta harremanak adieraztea, batzuentzako berebiziko beharra bihurtuta. Baina noraino baldintzatzen gaituzte teknologia berriek? Sozialagoak bihurtzen gara horien erabilpenagatik? Selfie-ak edo argazkiakpartekatu behar ditugu gure burua asetzeko?
Egia esan, ez da erraza aztertzea horien erabilpenak ekar ditzakeen ondorio negatiboak, teknologia berriak erabiltzen ditugun heinean, hazten doazelako. Baina ezin dugu ukatu gure emozioetan duten eragina, eta horretaz jabetzea nahitaezkoa dela. Azken finean, gure intimitatearen kontuak igotzen ditugunean, zer espero dugu? Besteen aprobazioa, arreta gureganatzea, besteen balioespen positiboak… gure burua aurkezteko beste modu bat besterik ez da, baina, nahigabe, hartu-eman batean sartzen gara, gure identitate digitala besteen eskuetan utzita, gure buruarekiko komentarioak kontrolaezinak bihurtzen diren arte.
Beraz, garrantzitsua da aintzat hartzea arrisku inkontziente horiek, eta, ihes egitea baino gehiago, nerabeei helaraztea garrantzi handiko gaia dela bakoitzaren berezitasunak modu baikorrean ulertzea, ezberdintasunak aberasten gaituztela ulertarazita. Hala, gizarteak ezarritako sexualitatearen eta edertasunaren aurreiritziak apurtzea errazagoa izango da eta guztion plazerak, gorputzak eta desirak lekua izango dute normaltasuna eta perfekzioaren mitoak hautsita.
Aurreko guztia laburbilduz, esan daiteke ezin dugula ukatu sare sozialak gure egunerokotasunaren parte direla. Horregatik, erabilpen egokia irakastea beharrezkotzat jotzen dugu etorkizun positiboa bermatu ahal izateko. Gogoratu, beraz, Internet toki seguruagoa bihurtuko dugula horiek egoki erabilita. Ondoriozta dezakegu nerabeen autoestimua indartzea eta pertsona aske eta kritikoak bihurtzea ezinbesteko helburua dela.
Iruzkinik ez "Gure seme-alaben belaunaldia teknologia berrien eta sare sozialen belaunaldia da"