Beste urte batez, Gurutze Gorriak hainbat ekimen jarri ditu martxan, eskolara bueltan, zailtasunak dituzten familiei laguntzeko.

Debagoienean, esaterako, bailarako 160 umek jaso dute oraingoan, Gurutze Gorriak banatutako eskola-materiala. Bazkideen dohaintzekin eta urtean zehar egindako Urrearen Zoketarekin erositako materiala da Gurutze Gorriak banatu duena. Eta bailaran, egoera zaurgarrian dauden 97 familiak jaso dute laguntza.

Hamabost boluntario eta gizarte langile aritu dira banaketa-lanetan, eta Gurutze Gorriak azaldu duenez, bailarako eskaera eta behar guztiei erantzun ahal izan diete.

Motxila, kutxatila oso –margoak, boligrafoak, gomak, etab.– eta koadernoekin osatutako loteak dira 160 haurrek jaso dituztenak, eta beste urte batzuetan bezala, haurren adina eta ikasturtea hartu dira kontuan materialak aukeratzerakoan.

Gurutze Gorriko bi kide Debagoienean jasotako materiala sailkatzen.

Oreretan eta Irunen, berriz, abuztuaren 16an hasi zen eskola-materiala jasotzeko kanpaina Alcampon, eta hilaren 15era bitartean luzatuko da epea. Beraz, oraindik ezin izan dute horietan jasotakoaren datu zehatzik eman.

Pasa den asteburuan berriz, Goierrin, Oiartzuneko Carrefourren zehazki, izan ziren eskola-materiala jasotzen eta ia probintzia guztian banatuko da bertan jasotakoa.

Asteburu horretan bertan, Donostiako Asanbladarekin batera, gazteen Gurutze Gorriak, Garberako Eroskin jasotakoa batu zuen eta Donostian bertan banatuko dute.

Bizkaian eta Araban, berriz, hilaren 18ko asteburuan egingo dute materialaren bilketa.