Gero eta gehiago dira bikotekiderik gabe ama izateko erabakia hartzen duten emakumeak. Adopzio edo intseminazio bitartez iristen dira ama izatera eta elkarte bat ere badute: Hala nahi izan dutelako bikotekiderik gabe ama direnen elkartea —gazteleraz— edo Madres solteras por elección (MSPE)


Itsasne Otadui arrasatearra elkarteko kide da eta azaldu du 2007an sortu zutela. Aurten, beraz, hamar urte beteko ditu elkarteak. Bazkide kopurua handitzen doala adierazi du Otaduik, eta elkartea tresna garrantzitsua dela prozesu horretan diharduten emakume askorentzako.

Elkartea ezagutzera emateko ahaleginean ari direla ere adierazi du. “Oso baliagarria da prozesu honetan aurrera egitea erabakitzen duten emakumeentzako. Esperientziak partekatzeko, ulertuago sentitzeko, eta sortzen diren hainbat egoeratan nora jo edukitzeko”, azaldu du. Topaketak ere antolatzen dituztela adierazi du: “Elkar ezagutzeko, elkarren berri edukitzeko, ez garela gutxi ikusteko…”, nabarmendu ditu.

Umeek ere elkar ezagutzeko aukera izatea garrantzitsua deritzo eta topaketa horietan familia eredu honi buruzko gogoetak ere egiten dituzten gaineratu du. “Nola azaldu beraien jatorria umeei, sortzen diren hainbat egoeraren aurrean nola jokatu ikasteko… “.

Otaduik dio gaur egun askotariko familia ereduak daudela eta garrantzitsuena dela ume maitatzea. Egunerokoan aurkitzen dituzten zailtasunen aurrean Otaduik nabarmentzen du inprimaki ofizialetan familia eredu honen aitortza eza: “Inprimaki bat betetzera zoaz eta agertzen da esate baterako banandutako gurasoen kasua, baina ez gurea. Uste dugu gure errealitatea ere ikusarazi behar dela gizartean”.

Bikotekiderik gabe ama izan nahi dutenei Otaduik gomendatzen die informazioa eskatzeko. “Ideia hori baduzu informatu elkartearen bitartez edo klinika baten bitartez. Ez da egia ama izateko iraungitze datarik ez dagoenik. Badago, eta garaiz informatzea da onena”.  

Elkartearen harremanetan jartzeko: euskadi@madressolterasporelección.com