Haurdunaldian, uretan bai arin!

Ura da haurdun dagoen emakumearentzat mugitu ahal izateko mediorik egokiena. Likidoak ur gainean ibiltzeko eta grabitaterik ezak mugimenduak egiteko aukera errazten du, eta, modu horretara, haurdun dagoen emakumeak lur zoruan egin ezingo lituzkeen edo deserosoak liratekeen mugimenduak egiteko erraztasuna dauka. Hori horrela, uretan ariketak egitea samurragoa egiten zaio. Puntua aldizkaritik ekarri dugu erreportajea.

Onura ugari
Uretan ariketak egiteak hainbat onura ditu haurdun dagoen emakumearendako. Alde batetik, uraren presioak traumatismo edo mugimendu zakarren lesio arriskuak gutxitzen ditu, bai ametan eta baita haurretan ere, ez duelako limiteak gainditzen uzten. Bestetik, haurdun dagoen emakumeari sasoikoago egoten laguntzen dio, funtzio fisiko kardiobaskularra hobetzen duelako, muskuluak haurdunaldi eta erditzen momenturako prestatzen dituelako, likidoak deuseztatzen laguntzen duelako, masaren gehiegizko hazkundea ekiditen duelako, arterien tentsioa hobetzen duelako eta haurdunaldiko diabetesetik babesten duelako.

Bestalde, urak erlaxamendu funtzioa dauka, bai psikologikoki eta baita fisikoki ere. Bizkarrezurra eta artikulazioak lasaitzen dira eta uretatik kanpo izaten duten gehiegizko pisua arintzen du. Gainera, umekiaren estimulazioa bultzatzen du uretan posizioa aldatzeko joerari esker, ahoz beherako etzapenetik ahoz gorako posiziora edo zutikako posiziora pasata.

Horrekin guztiarekin batera, haurdunaren pisua hainbeste ez igartzea errazten du, urak ematen duen grabitaterik ezaren aukerari esker, eta, emakume batzuek diotenaren arabera, igeriketak haurdunaldiaren goragaleak arintzen lagundu izan die. Gainera, energia gehiago izaten eta hobeto lo egiten ere laguntzen du.

Ikastaroa
Onura horien guztien jakitun, matrogym edo matrogimnasia ikastaroa antolatu du Arrasateko Udaleko Kirol Zerbitzuak, Musakolako kiroldegian, bigarren urtez. Dagoeneko ikastaroa hasi da, baina interesa duten haurdunek izena emateko lekua badago oraindik.

Matrogimnasia igerileku txikian, 32 gradutan egiten den gimnasia mota lasaia da; jarduera ludiko eta osasungarria. Erditzean parte hartzen duten gihar eta artikulazioak indartzeko eta elastikoago egiteko ariketa programa bat da eta bateratzen ditu pilatesa, joga, pelbisa mobilizatzeko eta zoru pelbikoa indartzeko ariketak.

Ariketa aerobikoa egiteko igerileku handian aritzen dira, gorputza berotu egiten da eta igerileku handiko tenperaturak gorputza termoerregulatzen laguntzen du, gehiegi berotzea ekidinda. Igerileku txikian haurdunaldiari dagozkion ariketa espezifikoak egiten dituzte, eta ariketa estatikoagoak, uraren tenperatura aprobetxatuta, hala nola odol isuria landu, aldakaren mugimenduak, luzaketak, perineari dagozkion ariketak, arnasketa eta erlaxazioa, besteak beste.
Arrasaten astelehen eta eguaztenetan egiten dute ordubeteko ikastaroa, Estitxu Zubillaga begiralearen aholkuei jarraituz, eta aletak, txurroak, baloiak eta taulak erabiltzen dituzte haurdunek, uretan daudela ariketak egiteko.

Zubillagaren esanetan, haurdun dauden emakumeek probetxu handia atera dezakete halako ikastaroetatik, eta parte hartzera animatzen ditu: “Urak dituen ezaugarriak kontuan izanda, haurdunek probetxu handiak atera ahal dituzte oso modu atsegin eta samurrean; orokorrean, mundu guztiak, baina, bereziki, haurdunek, pisua dela, mugikortasuna dela… erlaxatu egiten direlako uretan”.

ELKARRIZKETA

Estitxu Zubillaga: “Alderdi fisikoa, psikikoa eta soziala lantzen dira”

Matrogym edo matrogimnasia ikastaroa bigarren urtez jarraian egiten ari dira Arrasateko Musakola kiroldegian. Emakumeek haurdun dauden bitartean emaginarekin egiten duten gimnasiaren osagarri gisa eskaintzan hasi ziren, “dituen onura guztiengatik”, Zubillagak azaldu duen moduan.

Ze teknika erabiltzen duzue?

Haurduna osotasunean lantzen da; hau da, alderdi fisikoa, psikikoa eta soziala lantzen dira. Fisikoari dagokionez, erresistentzia aerobikoa garrantzitsua da, erditzea gogorra da-eta. Tonifikazioa ere lantzen da, orokorra eta espezifikoa ere bai, bizkarraldea, aldakak eta zona perineala kontuan izanda. Eta arnasketa ere lantzen da. Arlo psikologikoan, berriz, erlaxazioa lantzen da eta sozialari dagokionez, egoera berean dauden hainbat emakume elkartzean, bada, haurdunaldiarekin lotutako gaiak partekatzen dituzte, besteak beste.

Azken hori ere lagungarri egiten zaie.

Bai, eta horrekin batera gorputzaren aldaketez jabetzen ere laguntzen die. Hau da, bainujantzian etortzean ondokoaren gorputza aldatzen nola doan ikusten dute eta horrek norberaren aldaketak asimilatzen ere laguntzen die. Eta hori ere garrantzitsua da, gorputza asko aldatzen delako.