Haurrak Ere Bai plataformatik 2020/2021 ikasturteari hasiera emateko proposamen bat plazaratu zuten abuztuaren 30ean. Azaldu zuten helburua zela haurren osasuna modu integralean bermatzea.

Hilabete eta erdi inguru pasa den honetan beste komunikatu bat plazaratu dute non ohartu duten eskolara itzulera oso bestelako irizpideen arabera antolatua izan den. “Ikastetxe askotan diseinatu diren kontingentzia planak itxura militarra hartu dute osasun fisikoa zaintzearen izenean. Eusko Jaurlaritzak eskolei ezarri dien protokoloa aldatu dadin eskatzeko lanean dihardugu, baina bitartean zer egin dezakegu hezkuntza komunitatetik gure seme-alaben eskoletan protokoloa modu gizatiarrago batean aplikatzeko?”.

Proposamenak egin dituzte lotuta harrera emozionalarekin, kanpo espazioen erabilerarekin, maskaren erabilerarekin, gurasoen parte hartzearekin, isolamendu gelarekin, tenperatura hartzearekin zein gel hidro-alkoholikoarekin.

Protokoloa kontutan hartuta irakasleek eta familek egin ditzaketen eskaeren eta iradokizunen zerrenda egin dute. Hala ere, argitu dute plataformaren nahia dela “gobernuak inposatutako protokolo horren abolizioa. Politikariei eskatzen diegu, agintari izateari utzi eta arduradun izaten hasteko. Benetako ardurak har ditzatela gure seme-alaben osasun integrala bermatzeko eta hezkuntza komunitateari ere dagokion ardura hartzeko aukera eman diezaiotela, eskolara buelta adostua eta benetan segurua izan dadin”.

HARRERA EMOZIONALA

“Haur eta nerabeak emozionalki lagunduak izateko beharra ezinbestekotzat jotzen dugu; izan ere, etapa hauetan ezartzen baitira helduaroan osasun integral ezin hobe bat izateko oinarriak. Ezinbestekoa sentitzen dugu ikastetxe barruan zaintza eta babesa kalitatezkoa eta gertukoa izatea. Ikasleak gertutasunez, afektuz, begiradaz eta entzuteaz laguntzea. Aintzakotzat hartuko dugu, besteekin harremana izatean garatzen garela pertsona gisa”.

Plataformatik garrantzitsutzat jotzen dute ikasleei osasun krisialdi honetan bizitakoaz hitz egiteko aukera eskaintzea. “Kezkak eta beldurrak plazaratzeko modu antolatu eta sistematiko batean, eta ez tarte batean edo momentu batean egiteko. Horretarako eskoletan jasotzen dituzten formakuntza saioak erabili daitezke irakasleei tresna egokiak eskaintzeko”.

Eta haurrek jarrera ‘disidente’ bat dutenean –dela maskara jaistea edo burbuila taldekoa ez den lagunen batengana hurbiltzea– irakasleak jarrera egokia edukitza: “Ulerkortasunetik hitz egitea onetsiz eta beldurrean oinarritutako jarrerak edo mezuak ekidituz”.

KANPO ESPAZIOEN ERABILERA GEHITZEA

Uste dute, halaber, ikastetxeei ahal den neurrian kanpo espazioen erabilera gehitzeko eskatu behar zaila natura hezkuntzarako gune gehigarri gisa eskainiz. “Munduko Osasun Erakundeak eskolak aire zabalean ematea gomendatzen du. Aire librean, COVID-19 birusaren kutsatzeko arriskua txikiagoa da. Espazio itxietan COVID-19ak 8-14 minutuz uzten ditu arrastoak airean (Stadnytskyi et al., 2020). Txinan egindako ikerketa baten arabera aztertutako 7.300 positiboetatik soilik 1 kutsatu zen aire librean. Save The Children-en arabera, aire librean jolasteko ezintasunak, epe luzean itxita egoteak eragindako estresak, asperdurak eta distantziamendu sozialak antsietatea eta depresioa eragiten dute haurrengan eta antzeko emaitzetara iritsi dira EHUko bi ikerketan ere –OPIK, Ozamiz-Etxebarria et al., 2020–. Azkenik, EDNA elkarteak –Asociación Nacional de Educación en la Naturaleza de España– naturan heztearen aldeko manifestu bat sortu du eta jada 2000 pertsonak baino gehiagok sinatu dute”.

MASKARAREN ERABILERA

LH1-etik gorako haurrek eta nerabeek maskararekin egon behar dira eskola orduetan. “Protokoloaren azken egokitzapenak aukera ematen du maskararik gabe egoteko baldin eta kanpo espazioetan, bizikidetza taldeetan eta metro eta erdiko distantzia mantenduz egonez gero”. Hala, protokoloak aukera ematen duen zirrikitu oro erabiltzeko eskatzen dute plataformatik, eta ikastetxeek ahalegina egin dezatela arnas guneak sortu eta hala nahi duten haurrek aukera izan dezaten maskara kentzeko.

“Gorputz hezkuntzako saioetan haurrek eta nerabeek kirola maskararekin egin beharra gehiegizkoa da. Berebiziko ahalegina egin beharko litzateke haurrek kirola maskararik gabe egiteko protokoloak ezartzen dituen baldintzak betetzea lortzeko eta kirola egiten duten unean arnasa libreki hartzeko aukera izan dezaten. Protokoloak ezartzen dituen baldintzak betetzeko eskolak behar duen laguntza eskaini dezakegu, elkarlana proposatuz”.

“Eta hezitzaile bakoitza aske da bere burua egoki ikusten duen maskararekin babesteko, baina gardenak izatea garrantzitsua iruditzen zaigu, batez ere txikienekin eta heziketa premia berezia duten haurrekin jarduten denean”.

GURASOEN PARTE HARTZEA

Protokoloak gurasoak eta famliak ikastetxeetatik kanporatuak izan direla ziurtatzen dute Haurrak Ere Bai plataformatik. “Hala ere, ikastetxeko espazioetan sartu ezinak ez du esan nahi gurasook ikastetxearekin elkarlanik egin ezin dugunik. Herrian dauden kanpo espazioen erabilera ikastetxeen zerbitzura jartzeko egin beharreko eskaerak egiten laguntzeko prest dauden gurasoak kontuan hartu behar dira eta kanpo espazioetara haurrak ateratzeko orduan –beti ere irakasle baten ardurapean– kontuan hartu behar dira ateraldi horiek seguruagoak izan daitezen parte hartzeko prest dauden gurasoak, irakasleak lan karga soilik beregain hartu ez dezan”.

Txangoak egiteko laguntzeko prest daude gurasoak ere kontuan hartzeko eskatzen duten.

ISOLAMENDU GELA

Eskolan gaixotzen diren haurrak uneoro akonpainatuak izatea eska daitekeela azpimarratzen dute: “Eta haien intimitatea gordetzea, familiak bila etorri arte”.

TENPERATURA HARTZEA

“Gurasook har dezakegu tenperatura etxean hartzeko ardura eta ikastetxeei eska diezaiokegu familiengan konfiantza izateko. Hala ere, ikastetxean tenperatura hartzeko erabakia aldatuko ez balitz, modu natural eta goxoan egitea eska dezakegu. Irudi gogorra egiten da haurrak lerroan eta buruan tenperatura hartzearen momentua eta ekintza. Gelan sartu ostean hartzea proposatzea posible da, lasaitasunez, galdetuz eta buruan edo eskumuturrean hartzeko aukera emanda”.

GEL HIDRO-ALKOHOLIKOA

“Eskuak garbitzearen garrantzia onartzen dugu, eta COVID-19 testuinguru honetatik kanpora ere jarrera osasuntsua da, baina urarekin eta xaboiarekin egitea eska daiteke. Gel hidro-alkoholikoa nahi duten familiei aukera hori kendu gabe produktu horren toxizitatearekin eta maiztasun handiarekin erabiltzeak ekar ditzakeen ondorioekin kezkatuta gauden familien seme-alabei ura eta xaboia erabiltzeko aukera eska daiteke”.

“Aski da! Babestu ditzagun mindu gabe. Utzi Haurrak Pakean!”