Haurrei sendagairen bat ematerako orduan kontutan izan beharreko lau akats eta horiek ekiditeko gomendioak azaldu ditu Azkoitiko Azpiazu Farmaziako Luis Fernandez farmazialariak @azpiazufarmazia Instagram kontuan.

Honakoak dira eman dituen argibideak:

  1. Sukaldeko koilara erabiltzea botika dosifikatzeko: dioenez, praktikoa da, baina ez da zehatza. Dosifikatzailea edo xiringa erabiltzeko gomendatu du.
  2. Sendagaia esnearekin edo zukuarekin nahastea: azaldu du zenbait botika esnearekin edo zukuarekin nahastuta, efektua galdu egiten dutela. Nahastu aurretik, farmazian edo medikuari galdetzeko eskatu du.
  3. Haurra hobetzen denean, tratamendua moztea: hori egin ohi dela nabarmendu du, batez ere, antibiotikoekin. Hobekuntza antzeman arren, ziklo osoa bete behar dela gaineratu du, tratamendua bete arte.
  4. Botika gaizki kontserbatzea: azaldu du botika batzuk hozkailuan gorde behar direla eta beste batzuk, ireki bezain laster iraungitzen direla. Hori kontuan izateko aholkatu du.

Amaitzeko adierazi du, normala dela egiten diren akats horien berri ez izatea, baina kontuan hartzea eraginkorra izan daitekeela, eta haurraren osasunean nabaritu daitekeela. Edozein zalantzaren aurrean galdetzeko eskatu du.