Haurrek ez al dakite jolasten? Etxean jolas librea ahalbidetzeko ideia batzuk

Izenburu honekin argitaratu zuten 2016ko  irailean post interesgarri bat “Tierra en las manos” blogean. Esanak esan, egileak argi dauka haurrek berez dutela jolasteko gaitasuna, eta hori ez dela aldatu.Egilearen iritziz aldatu dena eskaintzen diegun ingurua da.

Nolakoa da eskaintzen diegun ingurua?

Normalean haurrari estimulu gehiegi eskaintzen dion ingurua izaten da:teknologia gehiegi edo bakarrik dabiltzan jostailuak.

Bestalde, denbora falta ere badago. Astean zehar eskolak eta eskolaz kanpoko jarduerek denbora libre gehiena hartzen dute. Aste bukaeretan ere dena planifikatzeko ohitura garatu dugu. Nahiz eta jarduera dibertigarriak eta ludikoak izan, agian haurraren beharrak beste batzuk dira.

Bi faktore horien ondorioz haurrak ohitu ditugu etengabe estimulatuta egotera, eta estimulu hori bat-batean kenduta ez dakite zer egin.Urduri jartzen dira etengabeko estimuluetara ohitu ditugulako.Hala, etxean jolas librea sustatu nahi badugu egileak azpimarratzen du beharrezkoa dela ingurua zaintzea.

Ongi prestatu ingurua

Ingurua egoki prestatzeko egileak dio garrantzitsua dela, esaterako, materiala haurraren eskura egotea. Ez du ezertarako balio etxea plastilinaz eta margoz beteta edukitzeak, horiek ez badaude haurraren eskura. Halaber, jostailu guztiak armairu barruan badaude ez dute haurraren arreta bereganatuko.

Postean lau ideia edo proposamen luzatzen ditu egileak.

Espazioak iradokitzailea izan behar du. Horretarako haurraren eskura egon behar dira materialak. Bere garaierara egokitutako altzari irekiak aproposak dira horretarako.

Denak egon behar du gutxi gorabehera ordenatua. Garbi dago ezingo dugula dena txukun-txukun eduki beti, baina gauzek beraien lekua izatea garrantzitsua  da haurrak behar duena aurki dezan.

Espazioa ez dadila gainezka egon. Zaila da estimulu gehiegi daudenean zerbaitetan zentratzea. Horregatik da garrantzitsua jolas gunean zerk egon behar duen ondo pentsatzea.

Adinera egokitutako materiala aukeratu. Haurrak txikiak direnean gurasoak sarri aurreratu egiten gara eta irrikaren irrikaz gure ustez izugarri onak diren materialak eta jolasak eskaintzen dizkiegu. Sarri goizegi izaten da.

Haurrak eskura dituen jostailuak eta materialak birpentsatu

Tierra en las manos blogean, aurretik ere, idatzi izan dute kalitatezko jostailuak eskaintzearen garrantziaz. Aipatzen ari garen idatzian, ordea, bi galdera nagusi  plazaratu dituzte.

• Zerk pizten du haurren interesa?

Oinarrizko galdera dugu honakoa. Hainbat adituk gomendatutako kalitatezko jostailu hezitzaile zoragarriz bete dezakegu etxea, baina horiek ez badute haurraren interesa pizten hautsa hartuko dute apalean.

Horrek ez du esan nahi beti ahoz eskatzen dutena bakarrik eman behar diegula. Beti eskainiko diegu gure ustez egokia edo gustukoa izango duen materiala edo jostailua.Egileak haurrei begiratu eta zer, nola eta zerekin jolasten diren aztertzera gonbidatzen gaitu.

• Zer nahi dugu gertatzea etxean?

Hau da egileak egiten duen bigarren galdera.  Teknologiarekin jolastea nahi al dugu? Korrika eta salto egiteko espazioa nahi ote dugu? Modu autonomoan jolastea nahi dugu? Beraien jolasa beraiek zuzentzea eta barruak eskatzen dienarekin eta eskatzen dien moduan jolastea nahi dugu?

Hori horrela bada eskain diezaiegun beraien ezaugarrietara egokitzen diren espazioak eta materialak.

Ados,denetik egin dut eta saiatu naiz baina haurrak ez da bakarrik jolasten!

Egileak dio haur bakoitza mundu bat dela, eta erantzun orokorrek ez dutela balio. Mila faktore daude, eta elkarren artean nahastuta gainera. Dena den, hausnarketa batzuk plazaratzen ditu.

• Gurasook badakigu telebistarik edo telefonorik gabe egoten? Egun osoa telefonoari begira bagaude oso normala da haurrek telefonoa eskatzea. Gai gara denbora batean jolasten edo irakurtzen lasai egoteko? Haurrek gure ohiturak imitatzen dituzte.

• Zelakoa da haurraren agenda? Oso beteta eta bideratuta dago? Horrela bada, agian, komenigarria izango da eskolaz kanpoko jarduerak birplanteatzea. Ahalik eta denbora gehiago eskaini, eta aukeratu ahalik eta jarduera irekienak.

• Nola dago haurra une honetan? Galdera zabala da, eta familiaren arabera erantzun ezberdinak izango ditu. Baina egileari garrantzitsua iruditu zaio egitea. Haurrak bizi duen unearen arabera —beldurrak, lotsa…— ez da erraza izango gauza berrietan hastea.

• Gurasoak gertu gaude? Haurrak aske sentitu behar du garatzeko eta jolasteko, baina garrantzizkoa izango du erreferentziazko laguntza non duen jakitea.