Haurren kontrako delitu sexual digitalen salaketak igo egin dira; 2022an, 954 salaketa izan ziren, eta 2024an, 1.078. Urte horretan, era horretako 55 delitu antzeman ziren EAEn, eta biktima nagusiak neskak dira, kasuen %68,6a, hain zuzen. Delitu hauek, Interneteko sexu-kriminalitate guztiaren %84,2 izatera heldu dira.

Bestetik, biktimen batez besteko adina, 13 urtekoa da. Erasotzailearen profila berriz, gehienetan aurrekaririk penalik gabeko gizon bat da. Gainera, txostenaren arabera, erasotzaileen %41,7 biktimaren ingurukoak dira, %33,3 ezezagunak eta, azkenik, kasuen %25ean dira senideak. Azken zifra hori 2021-2022 aldian jasotako %3,3koa baino nabarmen handiagoa da.

Horiek dira Save the Childrenek aurkeztutako analisiaren datu batzuk. Ildo horretan, gogorarazi dute, internet ez dela soilik “indarkeria baliatzeko kanal berri bat”, ingurune digitalari “berezko zaizkion indarkeria modu berri batzuei ere bide eman diola”. Horregatik, internet erabiltzen hasteko “gero eta adin goiztiarragoan” jarri du arreta Save the Childrenek; EAEn, 11 urtetik aurrerako %81,5ak ohikotasunez erabiltzen du internet, –Estatuko %58ko batez bestekoa gaindituz– eta lautik bik baino gehiagok erabiltzen dute 10 urte bete baino lehen. “Plataforma digitalak gure egunerokotasunaren parte dira dagoeneko, sozializazio, aisialdi eta irakaspen espazio batean bihurtu dira, baina arriskuko ingurune batera daramate babesteko mekanismo egokirik ezean”, ohartarazi dute erakundetik.

28 kasutan oinarritua

2023-2024 aldian gertatutako 28 online grooming kasuen 23 epaien azterketan oinarritzen da Save the Childrenek aurkeztutako Pantailaren atzean: haurrenganako indarkeria sexuala ingurune digitalean izeneko txostena, eta hemen klikatuz ikusi daiteke osorik.

“Salaketek agerian jartzen hasi dira orain dela oso gutxira arte ezezaguna eta ikusezina zen arazo bat.Aldi berean, berretsi egiten dute indarkeria sexualak gaitz bat izaten jarraitzen duela eta ingurune digitaleko askotariko espazioetan ari dela zabaltzen. Ingurune horretan, neskak eta mutilak eraginpean daude pantailaren atzean nor egon daiteken egiaz jakin gabe”, adierazi du Charo Arranzek, Save the Childrenen Euskadiko zuzendariak.

Auzibide luzeak

Horrekin batera, nerabeenganako indarkeria sexual digitalaren kasuetako auzibideen iraupenagatik “kezka” adierazi du Save The Childrenek; izan ere, aztertutako kasuen %60k baino gehiagok hiru urte edo gehiagoko iraupena dute, eta %14k bost urtetik gorakoa. Gainera, biktimen %65ak, birritan baino baino gehiago aitortu behar dute. “Haur bat bere kontakizuna behin eta berriro errepikatzera behartzeak mina berriro bizitzera darama. Prozedura Kriminalaren Legearen 499.ter artikuak ezartzen du dagoeneko aurrez eratutako probaren derrigortasuna 14 urtetik beherako adinekoentzat. Babes hori adin horretatik gorakoentzat ere izan behar litzateke. Sistema prest egon behar du behin bakarrik entzun eta ondo egiteko”, dio Arranzek.