Zer dira? Zergatik gertatzen dira haurren amorrualdiak? Nola jokatu horrelako baten aurrean? Galdera horiek eta gehiago erantzun ditu sare sozialen bitartez Mar Lopez pediatrak eta hark emandako azalpenak ekarri ditugu hona.

Hasteko, azaldu du 18 hilabete eta 4 urte artean izaten direla ohikoenak, batez ere 2 eta 3 urte artean, nahiz eta 12 hilabetetik aurrera ere ager daitezkeen.

Zer dira?

Amorrualdiak, haurraren garapenean jarrera normalak dira. Modu oso bizi batean adierazten dituzte estualdiak edota haserreak. Normalean oihu egiten dute, negar, eta batzuetan objektuak apur ditzakete edota pertsonei min eman.

Zergatik gertatzen dira?

  • Euren desio eta jarritako mugen ondorioz sor daitezkeen frustrazioengatik.
  • Ni-aren garapenean, independentzia eta autonomia nahi dutelako.
  • Euren emozioak oraindik kontrolatzen ez dituztelako.
  • Komunikazioan mugatuta daudelako, zaila izan daitekeelako adieraztea.
  • Egozentrismo fasean egon daitekeelako (2-3 urte).
  • Batzuetan logureagatik, goseagatik, nekatuta daudelako…

Jarri bere lekuan: “Amarekin edo aitarekin jolastu nahi dut, baina eskolara eramaten naute eta lanera joaten dira. Amarekin edo aitarekin jolastu nahi dut, baina afaria egiten ari dira edota garbigailua jartzen… Zergatik inoiz ezin da izan nik nahi dudan bezala?”.

Zer egin dezaket horrelakoen aurrean?

Aukeratu. Beste jolas batean jolastu nahi badu ala kamiseta desberdin bat nahi badu, utz diezaiokezu. Balkoiko altzariaren gainean jolastu nahi badu, ezin diozu hori egiten utzi.

Onartu bere emozioa. Esaten badiozu “ez oihukatu” edota “ez egin negar”, ez zara ari bere emozioa onartzen. Hobeto hau izan daiteke: “Ulertzen dut haserretuta egotea, zuk gehiago jolastea nahi zenuelako” edo “haserre zaudela ikusten dut” edo “zuk jostailua nahi zenuen”…

Bere alboan gelditu, jaitsi bere altuerara.

Azaldu iezaiozu zergatik esan diozun ezetz.

Eskaini alternatiba bat: “Zer iruditzen zaizu jolas honetara jolasten badugu bainua hartu ondoren?”.

Aldatu enfokea. Pentsatu “batera ikasiko dugu”. Hazteko aukera bat da, zeure buruari eta seme-alabari buruz ikasteko eta zure txikiarekin elkartzeko aukera bat.

Jarri bere lekuan. Gogoratu nola sentitzen zaren negar egitea nahi duzunean eta nola nahi izaten duzun gainontzekoek laguntzea.

Utzi espazioa, batzuetan mugitzeko beharra izaten dute.

Uste duzunean momentua dela, galdetu ea besarkada bat nahi duen.

Zure umeak besarkada bat eskatzen badizu haserre dagoenean, emaiozu.

Barka zaitez: beti ez duzu jakingo egoera ondo kudeatzen. Behin huts egingo duzu eta hurrengoan aukera gehiago izango dituzu.

Zer ez egin?

Garrasi egitea edo mehatxatzea… kasketaldiak okerrera egingo du, emozioaren beldurra gehitzen zaiolako.

Beste haur batekin konparatzea, haur bakoitza desberdina da eta hori ez da ez ona ez txarra (batek ez du kasketaldirik izaten 2 urterekin eta bai 4 urterekin…).

Besarkatu, kontakturik nahi ez badu.

Zuri errua botatzea… ez da zuregatik edo hazteko moduagatik, fase normala da.

Alde batera utzi. Gaizki sentitzen bazara eta negar egiten baduzu… Ez duzu nahi norbaitek zu entzutea eta ulertzea eta elkarrekin egotea?

Amorrualdien prebentzioa

Denborarekin abisatu: “Arezko erloju hau amaitzean, dutxatzera jango gara” edo “egin puzzle bat gehiago eta gero pijama jantziko dugu”.

Presta zaitez beti ordu berean gertatzen bada. Adibidez, goizetan haserre esnatzen bada. Prestatu aurreko egunetik behar izango duzuna (gosaria, arropa…). Horrela behintzat beharrezko gauzak prest izango dituzu. Eman denbora; joan lotara lehenago, lehenago esnatzeko (eta haserrealdia badago, hori hobeto kudeatzeko. Lehenago esnatuz gero, haurrak ez du presa sentsazioa izango eta lasaiago egongo da).

Aukerak eskaini. Logelan ala egongelan jantzi nahi duzu? Janztea ezin dugu negoziatu, baina bai non jantzi.

Etxean muga zehatzak jarri. Hobeto da gutxiago izan, baina beharrezkoenak, baina konstanteak izan daitezela (ez aldakorrak) eta zehatzak (ondo ulertzeko modukoak).

Aukeratu momentua. Haurra nekatuta badago, agian ez da momentua erosketak egitera joateko. Ahal bada, aukeratu momentu egokia, gauza bakoitzarendako.