Haurrek izaten dituzten gaueko izuen eta amesgaiztoen inguruan idatzi du Puntua aldizkariko Adituen esanetan tartean Leire Azpiazu erizainak eta artikulu hori duzu irakurgai datozen lerroetan.

Haurrek gaueko esnaldiak izaten dituztenean, batzuetan, ametsetan egon dela esaten dugu. Baina gaizki erabiltzen dugun hitza da, askotan.

Esnaldi guztiak ez dira amesgaiztoengatik edo gaueko izuengatik izaten eta bata nahiz bestea desberdinak dira. Egia da biak, gutxi gorabehera, 2 urtetik aurrera ager daitezkeela. Adin hori baino lehenago ez dira izaten. Baina nola bereizi ditzakegu? Jarraian, horien arteko desberdintasunak eta jarraitu beharreko irizpideak azalduko dizkizut.

Zer da gaueko izua?

Umea berehala loalditik izututa esnatzen den egoera izaten da gaueko izua. Hori haurren %5etan agertzen den egoera da. Gaueko lehen zatian agertzen da; orokorrean, lehenengo bi orduen barruan. Haurra ez dago ametsetan, lo jarraitzen du.

Ez dago argi zergatik gertatzen den, baina sukarrak, lo-beharrak edo tentsio emozional egoera bat izateak egoera hori sorrarazi diezaioke haurrari. 3 eta 7 urte artekoek pairatu ohi dute, normalean.

  • Zer gertatzen zaio haurrari? Guk haurra oso ikaratuta, garrasika, izerditan eta arnasketa eta bihotz-taupada azkarrekin ikus dezakegu. Haurrak ez digu hitz egingo edota erantzungo. Tarte labur batez gertatzen da hori; gehienez, ere 15-20 minutuz. Gurasoak asko arduratzen dituen egoera da, deserosoa benetan.
  • Zer egin dezakegu halako egoera baten aurrean? Lehenik eta behin, haurraren lo-ordena egitura aztertu eta zaindu beharko dugu. Haurra nekatuegi egotea saihestu behar da, gauean horrelako egoera bat ez izateko. Gainera, tentsio-une horiek saihestea gomendatzen da. Haurraren lo-tokia segurua izatea ere komeni da. Halako pasarteren bat gertatuz gero, inguruak arrisku gabea izan behar du. Hurrengo egunean, gertatutakoaz ez hitz egitea gomendatzen da, haurrak ez duelako ezer gogoratuko.

Zer dira amesgaiztoak?

Amesgaiztoak, aldiz, gaueko azken txanpan gertatzen dira. Antsietatea eta beldurra sorrarazten duen lo txar bat da. Oso ohikoak izaten dira eta haurraren garapen normalaren barruan daude. 2 urtetik ager daitezke eta, normalean, 10 urte bete aurretik agertzen dira lehen aldiz.

  • Zer gertatzen zaio haurrari? Kasu horretan, lokartzea gehiago kostatuko zaio, bi arrazoirengatik: esnatu egingo delako eta gertatutakoaz oroituko delako. Gainera, gurasoen presentzia beharko du lasaiago egoteko.
  • Zer egin dezakegu halako egoera baten aurrean? Haurrarekin ametsari buruz hitz egin dezakegu eta lasaitzen saiatu gaitezke. Haren konfiantza izatea garrantzitsua da, eta horretarako, egia esan beharko diogu eta errealistak izan. Esaterako, mamuekin ametsa izan badu, horiek ez direla existitzen esango diogu; ametsean etxeko toki batean ikusi badu, bertara joan gaitezke, hori horrela ez dela ikus dezan. Baina gertaturiko zerbaiten inguruan amestu badu, maskotaren heriotza edo familiakide batena edota lagunekin haserrea, besteak beste, zentzuz eta egiarekin erantzun beharko diogu, hura lasaitzeko.