Haurren Hirien Sarea sortzeko ekimena martxan da

Euskal udalerrien sare bat sortzeko borondatearekin Haurren Hirien Sarea jarri du martxan Ikas-Ingurune Komunitarioen Laborategiak. Ekintza hainbat erakundek osatzen duten partzuergo batek bultzatzen du, hala nola, Eusko Jaurlaritzako Hezkuntza Sailak, Bizkaiko Foru Aldundiak, Leioako Udalak, EHUko Irakasle Unibertsitate Eskolak, Solasgunek eta Innobasque-Berrikuntzaren Euskal Agentziak.

Herritarren hazkunde eta garapenarekin konprometituriko udalerrien sarea sortu gura dute, non gizarte-gune komunak ikasgune inklusibo eta malgu bihurtu nahi dituzten “pertsonen burujabetasun eta autonomia sustatzeko eta haien hazkunde-ahalmen guztia garatzeko”.

Francesco Tonucci italiar pedagogo ospetsuak babesten du ekimena eta esperientziaren Herrigune edo abiapuntua Leioa izango da. Bizkaiko udalerriak 10 urte baino gehiago daramatza bide honetan. Alkatetzak Umeen Kontseilua du organo aholku-emaileetako bat, eta konprometituta dago honen gomendioak entzutera.

Francesco Tonuccik sustatzen duen La Cittá de i Bambini proiektuak hiriak gobernatzeko beste eredu bat proposatzen du, haurrak harturik herritar guztien beharrizan edo premien parametro eta berme gisa. Kontua ez da haurrentzako baliabideak eta zerbitzuak gehitzea, baizik eta guztiontzako hiri hobea eraikitzea. Haurren Hiriak hirietan haurrei burujabetasuna itzultzeko ekintzak gauzatzen ditu, eta horien parte-hartzea sustatzen du tokiko gobernuetan, ahotsa emanez beraiengan pentsatuz egitura daitezen hiriak.

Argazkiaren iturria hemen.