Haurren aho-hortzetako osasuna bermatzeko, Eusko Jaurlaritzako Osasun Sailak, duela 35 urte sortu zuen Haurren Hortzak Zaintzeko Programa (PADI). Programak, hortzen garapen eta zaintza onerako garrantzitsua den adin tartea hartzen du, urtero 200.000 haur inguru artatuz. Hori posible izateko, Euskadiko Odontologo eta Estomatologoen Elkargo Ofizialen laguntza du.

Osakidetzako profesionalekin batera, dentista ugarik parte hartzen dute PADIn. Programak bere baitan hartzen du, besteak beste, urteko berrikuspena. Horri esker, dentistek garaiz detektatu eta tratatu ditzakete txantxarrak. Bestalde, zainketa prebentiboak eta konpontzaileak ere egiten dira, baita aho-higienerako beharrezko ohiturak indartu ere.

Estaldura zabaldu dute

Gainera, duela bi urte Osakidetzaren estaldura hori 0 eta 6 urte bitarteko haurrengan ere zabaldu zuen. Zerbitzu horrek, 108.000 haur inguruko xede-biztanleriari mesede egin diezaiokeela kalkulatzen dute Eusko Jaurlaritzatik. Haur hauekin, txantxarraren hasierako lesioen prebentzioan eta detekzio goiztiarretan jarduten da, baita bizitzaren hasierako etapetan ere, lehen esne-hortzak ateratzen direnean.

Horrekin batera, 2023az geroztik, beste kolektibo batzuk ere sartu ditu Osakidetzak aho-hortzeko osasun-zerbitzuen eskaintzan. Urte bete beranduago, Osakidetzako Lehen Mailako Arretako hortz-unitate guztietara hedatu ziren haurdunaldian zeharreko hortzetako prebentzio-jarduketak. Era berean, paziente onkologikoentzako hortzetako prestazioak Euskal Osasun Zerbitzuaren kontsulta publikoetan aplikatzen dira.

Estatuko aho-hortzen osasun “onena”

Eusko Jaurlaritzak zabaldutako Euskal Autonomia Erkidegoko Aho-hortzetako Osasunaren IV. Ikerketa
Epidemiologikoaren arabera, EAEko eskola-haurren aho-hortzen osasuna estatuko “onena” da. Datuen arabera, Danimarka bezalako herrialdeekin batera kokatzen da. Txostena 1988. urteaz geroztik, hamar urtean behin egiten da eta 7, 12 eta 14 urteko haurren aho-hortzen osasunaren erradiografia eskaintzen du.

Dena den, Osasun Sailaren helburua “etengabeko hobekuntza” dela adierazi dute, eta, Eusko Jaurlaritzak, 2026an 7,7 milioi euroko gastua egiteko baimena eman dio PADIri. Bestalde, herritarrak informatzeko eta sentsibilizatzeko kanpaina jarriko du abian Osasun Sailak. “Kanpaina horrek arreta berezia eskainiko die PADIren estaldura-tasarik txikiena duten Euskadiko eremuei, hala nola landa-eremuei edo hiriguneetatik urrun dauden eremuei” diote.