Garrantzitsua da haurraren aho-osasuna kontutan hartzea, jaiotzen zaion lehen hortzetik hasita. Izan ere, txiki-txikitatik txantxarrak sortzeko arriskua izaten da eta hortzak noiztik eta nola garbitu ere jakin beharrekoak dira.

Baina zeintzuk dira gomendio orokorrak? Odontopediatren elkargoak horretarako duen protokoloari jarraiki, puntu hauek hartu behar dira kontutan.

Txantxarra genetikoa al da?

Ez. Txantxarra gaixotasun kroniko bat da eta hainbat arrazoigatik ager daitezke: ahoko higiene gutxi izateagatik, amaren listuaren bakterioen transmisio goiztiarragatik, azukre ugariko dieta eramateagatik, gaueko elikaduragatik, odontopediatraren bisita berantiarragatik…

Zure ahoko bakterioak ez transmititzeko –batez ere txantxar-indize handia izan baduzu–, ez partekatu tresnak zure haurrarekin –koilarak, hortzetako eskuilak–; ez garbitu txupetea zure listuarekin; ez eman musuak ahoan eta ez egin putz zuzenean haren janariaren gainean hozteko.

Esne-hortzak erori egin behar badira, zergatik izan behar ditu osasuntsu?

Haurtzaroko txantxarrik gabeko aho bat, helduaroko aho osasuntsu batekin zuzenean lotuta dagoelako. Zure seme-alaba txantxarrik gabeko heldua izatea nahi baduzu, zaindu bere esne-hortzak. Horietan infekzioren bat badago, justu azpitik dauden hortz iraunkorrak kaltetu daitezke.

Izan ere, esne-hortzek zure umeak ondo murtxikatzeko balio dute, zuzen hitz egiteko, hortz iraunkorren lekua mantentzeko. Gainera, irribarre osasuntsu batek autoestimua garatzen ere laguntzen du.

Noiz hasi behar dut seme-alabaren ahoa garbitzen?

Behin esne-hortzak aterata, hortzetako pastarekin garbitu behar dira nahitaez. Erabili pasta bat fluor-kantitatean 1.000 ppm dituena, arroz-ale baten kantitatea jarrita eta gutxienez bi aldiz egunean.

18-24 hilabetetik aurrera, atzeko haginak hazitakoan, komeni da gauero, hortz-hari bat pasatzea horien artetik.

Gogoratu 7-8 urte bitarteko haurrek ez dutela ahoko higiene eraginkorra bakarrik egiteko behar besteko gaitasunik; beraz, gurasoen edo zaintzaileen ardura da gainbegiratzea eta errepasatzea.

Nolako hortzetako pasta erabili behar da?

6 hilabete eta 3 urte bitarteko haurren kasuan, hortzak egunean gutxienez bi aldiz garbitu, 1.000 ppm dituen hortz-pastarekin. Arroz ale baten kantitatea erabili.

3 eta 5 urte bitarteko haurrentzat, hortzak gutxienez egunean bitan eskuilatu, 1.000 ppm-ko fluor-pastarekin, ilar baten tamainako pasta erabilita.

5 urtetik aurrera, hortzak gutxienez egunean bitan eskuilatu behar dira, gutxienez 1.450 ppm-ko hortz-orearekin. Eta ilarraren tamainako pasta kantitatea erabilita.

Noiz eraman behar dut odontopediatrarengana?

Bere lehen urtebetetzea baino lehen eramatea gomendatzen du odontopediatren elkargoak. Izan ere, profesionalen aholkularitza goiztiarra lagungarri izango da umeak haginetako minik ez izateko edo hortzetako anestesiatik pasatu beharra ez izateko.