Igandetik aurrera kalera irteteko aukera izango dute 14 urtera arteko neska-mutikoek, baina zenbait baldintza betez. Besteak beste, egunean behin irten ahalko dira, ordubetez, eta gehienez ere etxetik kilometro baten bueltan. Betiere, etxeko heldu batek lagunduta.

Espainiako Gobernuko presidenteordeak Pablo Iglesiasek gaur eman ditu zehaztapen horiek guztiak osasun ministro Salvador Illarekin batera egin duen agerraldi batean.

Irteera horiek 09:00etatik 21:00ak bitartean izango dira, eta etxetik jostailuak eraman ahal izango dituzte kalera. Hala ere, ezin izango dituzte jolas-parkeak erabili eta ezingo dira beste haurrekin elkartu. Korrika egitea, salto egitea eta jolastea zilegi dela adierazi dute haurren arteko distantziak zaintzen badira eta beharrezkoak diren segurtasun neurriak hartzen badira. Landa eremuetan bizi diren haurrak mendi inguruan ibili ahalko dira.

COVID-19 koronabirusaren sintomak dituzten edo berrogeialdian dauden haurrak ezingo dute kalera irten. Gida bat argitaratuko dute jarraibide guztiekin.

Puntako orduak saihestu

Puntako edo jende gehieneko orduak saihesten ahalegintzeko eskatu dute eta zentzuz eta arduraz jokatzeko.

Heldu bakoitzeko gehienez ere hiru haur irten ahalko direla gaineratu dute. Etxetik ateratzean zein etxera sartzean eskuak ondo garbitu beharko dira. Musukoen erabilerari buruz Iglesiasek esan du ez dela beharrezkoa haurrei jartzea, baina gomendagarria dela jende asko ibiliko den lekuren batean egon behar badira.

Argazkiaren iturria hemen.