Haurren premiazko harrera egiteko hamar familia behar dira Araban

6 urte arteko haurren urgentziazko harrera egiteko bilatzen ditu familia horiek Arabako Foru Aldundiak. Sentsibilizazio kanpaina bat jarri dute martxan eta informazio hitzaldiak ere egiten ari dira.

Sentsibilizazio kanpainaren barruan Baduzu zer eman, egin harrera izenburuko bideoa kaleratu dute eta hitzaldiak gaur, azaroak 23 eta abenduaren 14an izango dira Gasteizen. Bideoan Arabako Familia Harrerako Programa (Paafa) osatzen duten hamar guraso dira protagonista. Nork bere bizipenak kontatzen ditu.

Harrera babes neurri bat da. Hainbat ume daude askotariko egoerak direla-eta gurasoekin bizi ezin direnak eta ondorioztatuta dago harrera zentroetan baino hobeto daudela familietan. Aldi berean, beren gurasoekin harremanetan jarrai dezakete.

Arabako Foru Aldundiak emandako datuen arabera egun, ehun bat adingabe bizi dira harreran. “Familia horien inplikazioa eskertzekoa den arren, adin txikiko asko daude foru sareko etxebizitza eta zentroetan, eta aukera dago familiek haiek harreran hartzeko. Gaur egun, harrera familiak behar dira familia harreraren modalitate guztietarako: larrialdietako harrera, aldi baterako harrerak eta harrera iraunkorrak, eta espezializatuen harrerak, bai adingabe bakar batentzat, bai anai-arreben taldeentzat”, adierazi dute.

Familia profil eta mota guztiek har dezakete haur bat harreran: familiek, bikoteek, bikoterik gabeko pertsonek, seme-alabak dituztenek edo ez dutenek. Interesdunak familia harrerako programarekin jar daitezke harremanetan, 945 77 30 52 telefono zenbakira deituz edo acogimiento@araba.eus helbide elektronikora idatziz.

Informazio hitzaldiak

Familia harrera gertuagotik ezagutzera emateko aurrez aurreko informazio hitzaldiak antolatu ditu Arabako Foru Aldundiak. Hitzaldiok babesgabetasun egoeran dauden haurrak eta nerabeak hartu nahi dituztenentzat dira. Gasteizko Dato kaleko 43. zenbakian dagoen San Prudencio Fundazioaren ekitaldi aretoan izango dira, 18:00etan. Gaur, azaroak 23 eta abenduaren 14an egingo dituzte.

Bertaratzen direnek harrera programaren inguruko oinarrizko informazioa jasoko dute. Hala nola, aztertuko dira adingabeen ezaugarriak eta bizipenak, protagonista bakoitzak harreran zer zeregin duen, zein lege eta administrazio esparru dagokion…

Argibide gehiagorako:

• 945 77 30 52 telefono zenbakian.
• acogimiento@araba.eus helbide elektronikoan.

“Egin harrera/Acoge” Kanpaina – Spot euskara from Arabako Foru Aldundia on Vimeo.