Berriozarren egoitza izango duen eskola berria hainbat gurasok osatutako kooperatiba batek zuzenduko du, eta Iruñean dagoen euskarazko haur eskolen plaza eskasiari irtenbidea emateko sortu dute. Beraien asmoa eta ametsa litzake 2021/22 ikasturterako “Herri Haur Eskola itxi eta sistema publikora itzultzea”.  

HE Gurasoak plataformak  Iruñeko euskarazko Haur Eskolen murrizketa dela eta sortutako guraso taldea da. EH Bildu Iruñeko udalera heldu zenean hartutako neurrietako bat izan zen euskarazko plaza gehiago egongo zirela haur eskolatan. Bada, guraso batzuk kexatu egin ziren neurri horren aurrean, eta epaitegietara jo zuten. Epaitegiak arrazoia eman zien, eta ostean etorri zen gobernu aldaketa Iruñean. “Navarra Sumak esan zuen orduan behartuta zegoela epaileak esandakoa betetzera, eta euskarazko plazak murriztera”, esan du HE Gurasoak plataformako kide Ainara Iparragirrek. Une hartan familia asko beraien seme-alabendako plaza barik geratu zen.

Eskaera eskaintza baino handiagoa

Familiak erakunde ezberdinetako ordezkariekin biltzen hasi ziren orduan, euskarazko plazak handitzeko egin zitekeenaz hitz egiteko. Askotariko erantzunak jaso zituzten. “Alderdi batzuen babesa hasieratik jaso dugu. Beste batzuek esaten digute arrazoi dugula, baina ezin dutela ezer egin. Azkenik, badaude, paso egiten dutenak ere”, dio Iparragirrek.

Erantzun falta horren aurrean, hurrengo ikasturteari begira lanean hasi ziren. “Gure seme-alabek euskaraz ikasteko eskubidea dute, eta aukera publikoan ezin bada, gure kabuz beste bide bat topatu dugu”, esan dute. Hain justu ere, Herri Haur Eskola.

HE Gurasoak plataformako kideek azaldu dutenez eskola horren eredua haur eskola publikoen ahalik eta antzekoena izango da: tarifa publikoekin, udalak egindako egokitzapenen ondorioz lanik gabe gelditutako hezitzaileekin eta udal haur eskolen metodologiarekin.

Egoitza Berriozarren

Eskola ipintzeko lokal bila ibili ostean Berriozarren topatu dute leku aproposena, eta han hasiko dute ikasturtea, irailean. Nahiz eta horrek ez duen arazoa guztiz konponduko. “Iruñea hegoaldean euskarazko plaza barik geratu dira. Guk gura genuen Herri Haur Eskola hegoaldean zabaldu, baina, leku egokiena Berriozarkoa da, eta hori ere, iparraldean dago. Hortaz, guraso askok gaztelerazko eredua aukeratu beharra izan dute hegoaldean”. Iruñea guztirako euskarazko hogei plaza bakarrik daude 2020/21 ikasturterako.