Adingabeen itxialdiaren baldintzak arintzeko eskaerak hainbat ekimen eta protesta ekitaldi eragin ditu azken asteotan. Espainiako presidente Pedro Sanchezek atzo adierazitakoaren arabera alarma egoera maiatzaren 9ra arte luzatzeko eskaera egingo dio Kongresuaren, eta horrekin batera baita ere umeen itxialdia arintzeko eskaera.

Hala, Hego Euskal Herriko neska-mutikoek ere kalera irteteko aukera izango dute, baina irteera horiek baldintza zorrotzak bete beharko dituzte; izan ere, irteera “murriztuak eta baldintzatuak” izango direla esan zuen Sanchezek.

Adina, denbora eta distantzia soziala zainduta

Itxialdiaren arintzeak 12 urte arteko neska-mutikoei eragingo diela esan zuen, baina adin tartea zehaztu gabe dagoela gaineratuta eta Osasun Publikoaren Legea aipatuta.

Horrekin batera esan zuen etxetik “egunean tarte batez” irteteko aukera izango dutela, baina noiz eta zenbat denboraz argitu gabe. Baldintza horiek guztiak datozen egunetan argituko dituzte. Hori bai, pertsona heldu baten konpainian, denbora mugatuarekin eta beste neska-mutikoekin edo helduekin kontaktua saihestuz egin beharreko irteerak izango dira.

Hortik aurrera, xehetasun gutxi daude, eta erantzunik gabeko galdera ugari gelditu dira airean.

Lehen erreakzioak

Albistea lehen pauso moduan ikusten dute umeen itxialdia arintzeko burutu diren hainbat kanpainatan parte hartu duten kolektiboek. Dena den, argibide gehiago behar direla esan dute, eta 12 urtera arteko muga arbuiatzen dute hainbatek. “Nerabeekin zer?”, da galdera nagusietako bat.

Horrekin batera, umeen itxialdia arintzeko ekimenetako bat bultzatu duen Heike Freire pedagogoak ondorengo gogoeta egin du sare sozialetan: “Bazen garaia. Espero dezagun erabakia benetan betetzea hilaren 27an eta horrekin batera neurria umeen eskubide bat moduan hartzea, eta ez kapritxo bat moduan edo “umeak etxean gehiago jasaten ez dituzten gurasoei” egindako lagapen moduan”.

Osasunaren Mundu Erakundeak (OME) ere egokitzat jotzen du erabakia. Kontuan hartu behar da inguruko hainbat herrialdek baimentzen dituztela umeen irteerak dagoeneko.

Argazkiaren iturria: Kelly Sikkema.