Heldua maiz saiatzen da umea bere begietara moldatzen

“Haurrak askatasuna behar du erabakitzeko, bere beharren arabera, bere momentuko ahalmenen arabera, zer egin nahi duen, norekin eta noiz”, azaltzen du idatzi honetan Hazitegi taldeko Alexander Barandiaranek. “Helduaren ardura da horretarako aukerak eskaintzea eta horren ondorioz suertatzen diren esperientziak erregulatzea, baimentzearen eta mugatzearen orekak bilatzea”.

Haur Hezkuntza ikertzen ari den Mondragon Unibertsitateko Humanitate eta Hezkuntza Zientzien fakultateko talde bat Hazitegi. Edozein haur ume prototipora moldatzeko entrenamenduari buruz idatzi du Barandiaranek Autonomia, ongizaterako baldintza izeneko artikulua.

“Heldua maiz saiatzen da umea bere begietara moldatzen eta ahaleginak eta bi egiten ditu ume prototipora moldatzen edozein dela haurra”, azaltzen du bertan. “Haur eskolatik hasita (…) haurrak bere desioak alde batera utzi eta helduaren eskakizunei erantzun behar die (…) lehen hezkuntzarako prestatu behar ditugu da erabiltzen den arrazoietariko bat, gero DBHrako prestaketarako arrazoia bihurtuko dena, eta azkenean Unibertsitaterako ezinbestekoa izango dena. Entrenamendua ahalik eta arinen hasiz gero bukaerako profila lortzeko aukera gehiago izango denaren pentsamendua daukagu sakonean. Baina benetan profil hori lortzen dugu?”.

Hazitegitik Barandiaranek dio zaila dela pertsona autonomo eta autodeterminatu izatera heltzea, pertsona bera den hori onartzen ez dugun bitartean. “Zaila da ongizatea lortzea denbora oro besteen espektatibak betetzera bideratuta egonez gero, ahal bada edota ezin bada”.

Irakurri artikulua osorik hemen.

Argazkiaren iturria hemen.