Bizipoza Elkarteak ilusioz abiatu du udazkena, eta Bizipozaren IX. Jardunaldiak iragarri ditu. Usurbilgo Sutegi aretoan egingo dute azaroaren 8an, Usurbilgo Udalaren laguntzarekin. Aurtengo ardatza Heriotzaren Pedagogia izango da. Bizipoza elkartean sartu berria den Hil Argi elkartea izango da bidelagun. Jardunaldiak 09:30etik 13:30era izango dira.

Heriotzaren Pedagogia, begirada berri bat, beldurretik maitasunera lelopean egitaraua oparoa prestatu dute: aditu, hezitzaile eta elkarteen testigantzek osatuko dute saioa, dolua eta bizitzaren balioa ikuspegi pedagogikotik jorratuz.

Nere Erkiagak azaldu du “Heriotzaren Pedagogia” kontzeptuak hezkuntza eta bizitzaren ikuspegitik doluaren eta heriotzaren lanketa ahalbidetu nahi duela, eta jardunaldian horretarako tresnak eta esperientziak partekatuko direla.

Egitaraua bi zati nagusitan banatuko da, lehenengoan “Heriotzaren pedagogia ikastetxeetan” nola txertatu duten, zergatik eta esperientzia praktikoak ezagutuko ditugu. Horren inguruan Allende Salazar Herri Eskola (Gernika-Lumo), Gainzuri Ikastetxea (Urretxu-Zumarraga), Amassorrain Ikastola (Añorga, Donostia) eta Antzuolako Eskolako familia bat (Erkuden Iglesias, Araneren ama) arituko dira.
Saioa Nere Erkiagak moderatuko du.

Hamaiketako ondoren, 12:00etan, elkarteek mahai inguru bat eskainiko dute: “Heriotzaren pedagogiak zertan lagundu dezake gure elkarteetan?”, Amaia Agirre moderatzaile dela. Zati honetan Aspanogi, Iñurri, Naizen eta Txatxilipurdi elkarteek hartuko dute parte.

Julene Illarramendi (Iñurri elkartea) eta Iñaki Etxaniz (Gainzuri ikastetxea) izango dira jardunaldian parte hartuko dutenen artean, elkarteen errealitatea eta hezkuntza arloko ikuspegia ekarriz. Illaramendik adierazi du: “Iñurri heriotza batetik sortu zen. Mina transformatu da eta Iñurri sortu da”. Etxanizek, azkenik, honakoak adierazi ditu: “Hezkuntzan gaia nahiko tabu izan da, gaia naturalizatu behar da, ikastetxeetan ere honetan gabiltza”.

Bizipozak eskerrak eman dizkie Usurbilgo Udalari, Kutxa Fundazioari, Irizarri, Orona Fundazioari, Mitxelena Kooperatibari, LagunArori, Maierri eta Gipuzkoako Foru Aldundiari emandako babesagatik.

Parte hartzea doakoa da, eta zabalik da izen-ematea hemen.

Jardunaldia irekia da eta edonork parte hartu dezake, hezkuntza, heriotza eta emozioen inguruan hausnartu nahi duen orok.

Ikusi hemen kartela