Mobilizazio eguna zuten deitua, eta jasotako erantzunaren inguruan balorazio positiboa egiten dute deitzaileek. “Hezkuntza komunitateak hitza hartu du. Gure kezkak, premiak, aldarrikapenak eta proposamenak ere kaleratu ditugu. Dozenaka ekimen eta mobilizazio koloretsu egin dira Araba, Bizkaia, Gipuzkoa eta Nafarroako hainbat herri eta auzotan, eta oraindik hau idazten ari garenean jaso eta jaso jarraitzen dugu hainbat ekimenen argazkiak eta bideoak”, azaldu dute.

Eman dituzten datuen arabera mobilizazio deialdiak hainbat atxikimendu jaso ditu: “500dik gora luze norbanako, 70etik gora kolektibo eta hainbat hezkuntza eragile”, esan dute.

Aldarrikapenekin jarraitzeko asmoa

Abenduaren 1eko mobilizazio egunarekin ez dela ezer amaitu azpimarratu dute. “Hezkuntza komunitateak saretzen hasi gara, eta egunaren arrakasta ikusita atxikimenduak biltzen eta aldarrikapenak plazara ateratzen jarraituko dugu. Hurrengo egun eta asteetan ere hezkuntza komunitate zabala aldarriz eta kolorez janzten jarraituko dugu, auzoz auzo eta herriz herri amesten dugun hezkuntza-eredua aldarrikatuz. Egunero”.

Hezkuntza euskaldunagoa, feministagoa, inklusiboagoa, herritarragoa eta burujabeagoa nahi dute. “Hezkuntza nahi eta behar ditugun baliabidez hornitzeko aldarria plazaratuz jarraituko dugu, ratioak jaitsi behar direla ozen esanez, langile gehiago behar direla aldarrikatuz, espazio berriak zabaldu… Ikasleak eta hezkuntza komunitatea erdigunera ekarri behar direla argi azalduz. Gutxien duenari gehiago emanez, behetik gora, auzotik herrira, herritik Euskal Herrira! Hezkuntza Plazara!”.

Argazkien iturria: @hezk_plazara

ERLAZIONATUAK: Aitor Fernandez De Pinedo: “Egoeraren diagnostiko zorrotza eta horri aurre egiteko plangintza eta baliabideak behar ditugu”