Euskaraldiaren baitan haur eta nerabeek zer esan eta zer egin handia dutela sinetsita, Euskaraldiko zenbait eragile, hezkuntzan eta haur eta nerabeen sektorean ari direnak, lankidetzan ari dira 2018tik. Lankidetza horren emaitzeko bat hezkuntzako etapa ezberdinetan lantzeko proposamen didaktikoak izan dira.

Haur Hezkuntza, Lehen Hezkuntza, Derrigorrezko Bigarren Hezkuntza, Batxilergoa eta Lanbide Heziketan lantzeko unitate didaktikoak prestatu dituzte, zehazki, Ikastolen Elkarteak, Irrien Lagunek, Heztenek, EBETEk eta Kristau Eskolak.

Materiala hezkuntza sare osorako jarri dugu eskuragarri euskaraldia.eus gunean (Menu nagusian: Euskaraldia >> Proposamen didaktikoak). Unitate didaktikoak ikastetxeetan landuak izateko prestatuak izan diren arren, eremu ez-formaletan baliatzeko modukoak ere badira.

Helburu nagusia da modu ludikoan zein dinamika egingarrien bitartez, haur eta gazteek Euskaraldiaren berri izatea eta euren inguruko helduei ekimenaren berri ematea. Horrez gain, adinaren araberako helburu berezituak dituzte unitate didaktikoek:

  • Haur Hezkuntza eta Lehen Hezkuntza: ekimenaren bidez euskararekin esperientzia atseginak izatea eta hizkuntza aniztasuna lantzea.
  • Derrigorrezko Bigarren Hezkuntza: helduen xaxatzaile izateaz gain, beren hizkuntza praktikei buruzko gogoeta egitea, hau da, aurrera begira ahobizi edo belarriprest izateko prestatzea.
  • Batxilergoa eta Lanbide Heziketa: beren hizkuntza praktikei buruzko gogoeta egitea, ekimenean ahobizi zein belarriprest gisa parte hartzera animatzea eta hirugarren edizioari begira, erronka berriak jartzea.

“Proposamen didaktikoen informazioa, zein material hori erabiltzeko gonbitea, hezkuntza sare osoari helarazi zaio, Euskaraldiarekin bat eginda, ikastetxeetan euskararen bueltako komunitate izaera ere indartzen delako uste dugula adieraziz. Eta irakasleei, zuzenean, hurrengo hilabeteetako plangintzetan, material honi leku bat gordetzea ere proposatu diegu”, azaldu dute bultzatzaileek.