LAB, ELA, STEILAS, CCOO eta UGT sindikatuek agerraldi bateratua egin zuten atzo, osteguna, mobilizazioak eta greba deialdia iragartzeko. Ikasgeletara itzultzea “segurua eta adostua” izan behar dela diote, eta hori exijitzeko baliatuko dituzte gaur bertan hasi diren protestak.

Sindikatuek azaldu dutenez, behar pedagogikoei erantzungo dion aurrez aurreko ikasturte baten aldekoak dira, “bereziki zaurgarriak” diren ikasleak babesteko. Halere, horretarako segurtasun bermeak behar direla adierazi dute: “Egoera epidemiologiko kezkagarrian gaude, eta horregatik ezinbestekoa da aurrez aurreko itzulera segurua bermatzeko neurri eraginkorrak planifikatu eta hori posible izateko baliabideak jartzea”.

Hilaren 15eko grebara bitarte, bestelako mobilizazioak ere deitu dituzte. Gaur, irailak 4, ikastetxeetan argazki kolektiboak ateratzeko deia egin dute, eta hilaren 10ean, arratsaldeko 18:00etan, mobilizazioak egingo dituzte Hezkuntza Delegaritzen aurrean, Bilbon, Donostian eta Gasteizen.

Sindikatuen eskaerak:

  • Hezkuntza Sailak eta Patronalek interlokuzioa eta negoziazioa aktiba dezaten eskatu dute, plangintza elkarbanatu, negoziatu eta adosteko, “sektorez sektore” eta “kolektiboz kolektibo”.
  • Bestetik, lanpostu guztietan ordezkapenak lehenengo egunetik betetzea funtsezkoa dela azaldu dute.
  • Ratioei dagokienez, gehienez 10-15 ikasleko taldeak egotea eskatu dute, eta pertsona bakoitzak espazio nahikoa izatea segurtasun distantziak bermatzeko.
  • Garbiketako ratioak egokitu eta metrajea zehaztea ere exijitu dute, eta berdin jangelako langileentzat ere –zerbitzua ikasle guztientzako bermatuz–.
  • Eskola garraioan segurtasun eta garbitasun neurriak hartzearen beharra ere azpimarratu dute.
  • Bukatzeko, arrakalak bideratzeko neurriak ezartzea ere eskatu dute: arrakala pedagogiko, sozial, teknologiko, eta bereziki euskarari dagokionari erantzuteko bitartekoak, hain zuzen ere.

Adostasun eza Jaurlaritzarekin

Eusko Jaurlaritzak duela astebete, irailaren 27an, aurkeztu zuen 2020/2021 ikasturtea hasteko protokoloa. Hezkuntza komunitatearentzat eta sindikatuentzat, ordea, “berandu” iritsi da proposamena, eta “gehegi zehaztu gabe”.

Cristina Uriarte Hezkuntzako sailburuak agerraldia egin baino egun bat lehenago, ELA, LAB, CCOO eta UGT sindikatuek ohar bateratua kaleratu zuten; Hezkuntza Sailari ikasle eta langileen itzulera segurua exijitu zioten eta plangintza eragileekin eta sindikatuekin elkarlanean egin behar zela adierazi zioten.

Hurrengo egunean azaldu zuen Uriartek Jaurlaritzako Hezkuntza eta Osasun Sailek egindako protokoloa, baina sindikatuek berehala helarazi dute haien desadostasuna. LABen iritziz Jaurlaritza “motz eta itxurakerian” agertu da, eta komunitatearen beharrei “entzungor” egin die. ELAk ere protokoloa “berandu” eta “propaganda asmoekin” iritsi dela aurreratu du, eta Steilasek, bide beretik, neurriak “azkeneko orduan” eta “zalantzaz beteta” daudela.

Jaurlaritzak agindutako 1.000 irakasleren kontratazioek eragin dute desadostasun nabarmenena sindikatuengan. Steilasen ustez ez da nahikoa; haien arabera beste 6.000 beharko lirateke gutxienez. LAB eta ELAk, horrez gain, kontratazioen inguruko zalantzak azaleratu dituzte, ez baitakite zein irizpideren arabera egingo prozesua.

Horri lotuta LABk, ELAk, Steilasek eta CCOOk ez dute ulertzen nola ez den kontratazio gehiago aurreikusi gainerako langileentzat; adibidez, jangelako begiraleentzat eta garbitzaileentzat. Era berean, ratioak murrizteko beharra azpimarratu dute, besteak beste.