Gipuzkoako, Arabako eta Bizkaiko foru aldundiek elkarlanean antolatzen duten Udalekuak 2026 udako kanpainaren aurkezpena egin dute, txandakako sistemari jarraituz, aurten Gipuzkoan. Isaac Palencia Gipuzkoako Gazteriako zuzendariak Udalekuak 2026 eta Gazte Oporraldiak 2026 programetan parte hartzeko deialdiaren irekiera iragarri du.

4.289 plaza, inoiz baino gehiago

Udalekuak programak 4.289 plaza izango ditu aurten, iaz baino %4,3 gehiago: 4.004 euskaraz eta 285 elebidun. 7 eta 13 urte bitarteko haurrei zuzenduta dago, eta zazpi eguneko txandak egingo dira uztailaren 1etik 29ra.

Adin tarteen arabera, 7-8 urtekoentzat 404 plaza izango dira –guztiak euskaraz–; 9-11 urtekoentzat 2.245 plaza –2.090 euskaraz eta 155 elebidun–; eta 12-13 urtekoentzat 1.640 plaza –1.510 euskaraz eta 130 elebidun–.

Lurraldeka, 1.050 plaza izango dira Gipuzkoan; 1.695 Araban; eta 1.544 Bizkaian. Guztira, 177 adingabe gehiagok izango dute parte hartzeko aukera: 50 gehiagok Gipuzkoan, 67k Araban eta 30ek Bizkaian.

Palenciaren hitzetan, “udalekuak ilusio handiko unea dira ehunka haur eta gazterentzat; aisialdirako gune izateaz gain, autonomia, elkarbizitza, euskara, berdintasuna eta garapen pertsonal zein kolektiboa sustatzen dituzte”. Horregatik, plaza kopurua handitzeko ahalegina nabarmendu du, adingabe gehiagok espazio “seguru eta hezitzaileez” gozatu ahal izan dezaten.

Gainera, Gipuzkoak 40 plaza gehiago eskainiko ditu Hondarribiko aterpetxean egiten den Udaleku Teknologikoan, 7 eta 13 urte bitarteko gipuzkoarrentzat.

Hamabost instalazio hiru lurraldeetan

Udalekuak 2026 kanpaina hamabost instalaziotan egingo da. Gipuzkoan, Orioko Txurruka aterpetxean, Zarautzen, Juan Sebastian Elkanon –Hondarribia– eta zehaztu gabe dauden beste bi kokalekutan; Araban, Zuhatzan, Barrian –Barria-Narbaiza– eta Espejon; eta Bizkaian, La Arboledan, Gorlizen, Lurraskan, Meakaurren, Legasan eta beste bi tokitan.

Berritasun gisa, hiru aldundiek 146 euroko kuota orokor bakarra adostu dute. Prezioaren barruan sartzen dira ostatua eta mantenu osoa, dinamizazio zerbitzua, istripu eta erantzukizun zibileko asegurua, eta Donostiatik, Bilbotik edo Gasteiztik instalazioetarainoko joan-etorriak. Lurralde bakoitzak, gainera, hobariak ezartzen ditu familia ugarientzat eta gizarte laguntzak jasotzen dituzten familientzat.

Plazen %5 premia bereziak dituzten adingabeentzat gordeko da, elkarte espezializatuen laguntzarekin integrazioa bermatzeko. Txandak aisialdiko begirale tituludunek eta jarduera espezifikoetan adituek gidatuko dituzte.

Gazte Oporraldiak, 14-17 urtekoentzat

Gazte Oporraldiak programak 371 plaza eskainiko ditu Gipuzkoako 14 eta 17 urte bitarteko gazteentzat, uztailaren 1etik abuztuaren 7ra bitartean, 7, 10 eta 12 eguneko txandetan. Guztira 15 jarduera antolatu dira: 10 euskaraz –269 plaza– eta 5 gaztelaniaz –102–.

Horietatik 12 jarduera –256 plaza– Gaztela-Mantxa, Gaztela eta Leon, Aragoi, Madril eta Nafarroarekin koordinatuta egingo dira. Eskaintzaren artean daude arroilen jaitsiera, raftinga eta via ferratak Baztanen edo Alquezarren; abentura jarduerak Navarredondan eta Condemiosen; kostaldeko jarduerak Pilesen eta Benicassimen; eta uretako jarduerak Rascafrian eta Zuhatzan.

Gainera, Zarauzko surf udalekuak eta Orioko aterpetxeko jarduerak nabarmendu dituzte, baita Gasteizen egingo den Gazte Rock musika udalekuak eta Hondarribiko arte eszenikoen egonaldiak ere.

Izen-ematea eta zozketa

Udalekuak eta Gazte Oporraldiak programetako zozketan parte hartzeko izen-emateak martxoaren 6tik 20ra egingo dira Gipuzkoan; martxoaren 18tik 27ra Araban; eta martxoaren 9tik 18ra Bizkaian. Eskaerak gehienez hiru parte-hartzaileko taldeetan aurkeztu ahal izango dira.

Zozketa publikoak martxoaren 26an egingo dira Gipuzkoan; apirilaren 16an Araban; eta apirilaren 20an Bizkaian. Informazio guztia foru aldundien webguneetan egongo da eskuragarri.