Odoleko fosforo maila normala baino baxuagoa izaten dute errakitismoa duten pertsonek; Markel Caballero arrasatearra horietako bat da, eta Alberto Caballero, bere aita, patologia eta hari lotutako elkartea gizarteari ezagutarazteko lanetan ari da.

Askotariko errakitismoak egon arren, bi mota dira ohikoenak: X kromosomari lotutako errakitismo hipofosfatemikoa eta XLH, hereditarioa dena.

Lehenengoa diagnostikatu zioten arrasatearrari, 3 urte eta erdi zituela –orain 5 ditu–. “Oinez arraro ibiltzen zela ohartu ginen hasiera batean, baina pediatrak beti esaten zigun normala zela. Egun batean, parkean pilotarekin jolasten ari ginela, belaunean min hartu zuen eta konturatu ginen belauna zertxobait desbideratuta zeukala. Ordutik aurrera, medikutan hasi ginen, ez zelako normala gertatzen zitzaiona. Traumatologoarengana eraman genuen lehenengo, espezialista ezberdinengana gero, eta Nafarroako Opuseko ospitale batera azkenik. Han, Kongon ikasten aritutako traumatologo batek, ikustearekin bakarrik, errakitismoa diagnostikatu zion”, azaldu du Alberto Caballerok, aitak.

Arrasatearrarena ez da hereditarioa. “Nire semearen kasua isolatua da; hau da, ez du inorengandik heredatu. 20.000 haurretik bati diagnostikatzen diote patologia hau”, dio aitak.

Fosforoa, ohi baino baxuago

Caballeroren esanetan, fosforoa gorputzeko bigarren bitamina garrantzitsuena da, eta errakitismoa dutenen fosforo maila normala baino baxuagoa izaten da. “Horrek deformazioa eragiten du. Normalean, gorputz-adarretan izaten da deformazio hori, baina errakitismo mota desberdinak daude. Patologia hori dutenek giltzurrunean PHEX izeneko gene bat edukitzen dute, eta horrek eragiten du odoleko fosforo maila ohi baino baxuagoa izatea”, azpimarratu du.

Hori dela eta, egunean lau aldiz hartu behar izaten du fosforo dosi bat, hauts edo likido forman, “gorputza gehiago deformatu ez dadin”.

Elkartea gizarteratzen

Alberto Caballerok gura duena da euskal gizarteak jakin dezan patologia hau existitzen dela. “Espainia mailako elkarte bat ere badago, Asociacion Española de Raquitismos y Osteomalacia Heredados izenekoa”. Hala, itsulapiko batzuk jarri ditu Arrasateko hainbat tabernatan, elkarteari buruzko informazioarekin, patologiaren ikerketarako dirua batzeko, “oraindik ez delako hain ezaguna eta badagoelako zer ikertu”.

Euskal Autonomia Erkidegoan hiru errakitismo kasu daudela jakinarazi du Caballerok, bi Arrasaten eta bat Bilbon.