Txinaurriak proiektua Azpeitiko hiru ikastetxetan eskaintzen den kultur hezkuntza programa da, eta haur zein gazteen sormena, parte-hartzea eta pentsamendu kritikoa sustatzea du helburu. Hezkuntza formala osatuz, ikasleen ibilbide osoan zehar lau adierazpen-eremu lantzen dira: hitza, soinua, irudia eta gorputza. Proiektuaren baitan, azken saioetan hitza izan da ardatza, eta ikasleek aukera izan dute hitza entzun, irakurri, idatzi eta ahoz adierazteko, jolasen bidez eta euskaraz.

Hitza esanahia duen zerbait izateaz gain, ekintza ere bada. Egunerokoan erabiltzen den arren, askotan ahazten da hitzak direla harremanak sortzen dituztenak, poza zein mina eragiten dutenak, eta gu geu eraikitzen laguntzen dutenak. Hori guztia oinarri hartuta, saioen helburua izan da hitzaren indarraz eta ahalmenaz kontzientzia hartzea.

Hizkuntza modu osasuntsuan erabiltzeko lau gaitasun garatu behar dira: entzute (eta ulertzea), irakurtzea (eta ulertzea), idaztea eta hitz egitea, eta lau horiek izan dira saioen oinarriak. Ikasleak hiru txokotan banatu zituzten, bakoitzean gaitasun bat lantzeko asmoz: Lehen txokoan, hizki-zopa baten bidez hitzak bilatu eta testu bat sortu zuten, sormenetik abiatua; Bigarrenean, entzumenaren txokoan, abestien letrak osatu eta kantatu zituzten, erritmoa eta ulermena uztartuz; Azken txokoan, Dixit jolasa erabili zuten ahozko adierazpena eta irudimena lantzeko. karta baten irudia deskribatzeko hitz egokiak bilatu, eta besteen begiek ikusten ez zutena ulertzen saiatzen ziren.

Jarduera honen bidez, parte hartzaileek hizkuntzarekin harreman pertsonalagoa eta aktiboagoa izateko aukera izan zuten. Hitzekin jolasteak ulermena, irudimena eta elkarrekintza sustatu zituen. Hitzaren inguruko saio hauek amaituta, hurrengo geldialdia gorputzaren adierazpenean izango da.