Frantziako Asanbleak apirilaren 9an onartu zuen ‘Molac legea’ moduan ezagutuko den Hizkuntza gutxituen aldeko legea. Urrats historikotzat jo dute Ipar Euskal Herriko talde euskaltzaleek; izan ere, esparru finko eta koadro sendoago bat emango dio euskararen irakaskuntzari.

Gobernuaren borondatearen kontra egin du aurrera Bretainiako diputatu Paul Molac-en lege proposamenak. Hain zuzen ere, aldeko 247 boto eta kontrako 76 jaso zituen Asanblean.

Hizkuntza gutxituak ez dira frantsesak duen aitortza mailara helduko, baina urrats garrantzitsua da kontuan hartuta orain arteko egoera zein izan den eta legeak ekarriko dituen neurriak. Hain zuzen ere, 75 bat hizkuntza gutxitu daude Frantziar estatuan, eta horiek sustatzeko eta babesteko tresna izango da lege berria.

Hiru neurri nagusi

Legeak, besteak beste, murgiltze eredua legeztatzen du, eta iparraldeko hezkuntza publikoan euskara ikasteko eskubidea babestuko du aurrerantzean. Euskara ikasteko gastuak ere finantzatu egingo dira, eta diru-laguntzak jasotzeko aukera izango da. Gainera, seinale elebiduna ezartzea arautuko du.

Seaska ikastolen elkarteko zuzendari Hur Gorostiagak azpimarratu du Seaskak 52 urte daramatzala murgiltze eredua praktikan jartzen, baina hitzarmen bat besterik ez zuela Hezkuntza Ministerioarekin eta Euskararen Erakunde Publikoarekin.

Bestelako datuak ere eman ditu. Ipar Euskal Herrian haur hezkuntzako ikasleen %40ak ikasten du B edo D eredua. Lehen hezkuntzan %30 inguruk. Bigarren hezkuntzan, berriz, kolegio mailan gutxik eta lizeo mailan oraindik gutxiagok.

Euskal eragileak pozik

Euskal Konfederazioak Ipar Euskal Herriko talde euskaltzale guztiak elkartzen ditu. Bertako ordezkari Sebastian Castet-ek adierazi du hemendik aurrera Ipar Euskal Herriko eskola publiko guztiek eskaini beharko dutela euskarazko irakaskuntza. Historikotzat jo du erabakia. Balorazio berdina egin du Euskal Elkargoko presidente Jean-René Etchegarayk

Urrats garrantzitsua dela ezbaian jarri gabe oraindik ere bide luzea dagoela ohartarazi du Seaska ikastolen elkarteko zuzendari Hur Gorostiagak.

Gogoan izan du legea Gobernuaren borondatearen kontra irten dela aurrera, eta gerta daiteke baliabideak jartzeko unean Gobernua bera oztopo izatea.

Horrekin batera batek baino gehiagok ekarri dute gogora euskal ikasleek frantsesez idatzi behar dituztela, oraindik ere, azterketa gehienak; izan ere, Baxoa euskara egin ahal izateko aldarrikapenak hor jarraitzen du.

Egiari zor urrats honekin gertuago dago aldarrikapen hori ere lortzea.